بشیر النساء بیگم بشیر

 یوم وفات 20 فروری 1972

کہاں تک کوئی وضع اپنی سنبھالے

نظر آ رہے ہیں تماشے نرالے

پرستار مغرب نہ کیوں کر ہو دنیا

بناتے نئے بت ہیں تہذیب والے

گیا ذوق اہل نظر کی نظر سے

نئی روشنی کے ہیں سارے اجالے

بلاوے یہ پھر کیوں انہیں آ رہے ہیں

بھری بزم سے جو گئے ہیں نکالے

جو لذت میسر ہے ذوق طلب میں

نہیں اس سے واقف ترے عرش والے

تو نیرنگی روز و شب سے نہ اکتا

زمانے ابھی اور ہیں آنے والے

گئی آہ دنیا سے روشن ضمیری

کہ شاہیں بنے زاغ کی چلنے والے

نہ نکلیں گے کانٹے بشیرؔ اپنے دل کے

اگر ایک دو ہوں تو کوئی نکالے

بشیرالنساء بیگم بشیر