زہرا نگاہ

 یوم پیدائش 14 مئی 1937

نقش کی طرح ابھرنا بھی تمہی سے سیکھا

رفتہ رفتہ نظر آنا بھی تمہی سے سیکھا

تم سے حاصل ہوا اک گہرے سمندر کا سکوت

اور ہر موج سے لڑنا بھی تمہی سے سیکھا

اچھے شعروں کی پرکھ تم نے ہی سکھلائی مجھے

اپنے انداز سے کہنا بھی تمہی سے سیکھا

تم نے سمجھائے مری سوچ کو آداب ادب

لفظ و معنی سے الجھنا بھی تمہی سے سیکھا

رشتۂ ناز کو جانا بھی تو تم سے جانا

جامۂ فخر پہننا بھی تمہی سے سیکھا

چھوٹی سی بات پہ خوش ہونا مجھے آتا تھا

پر بڑی بات پہ چپ رہنا بھی تمہی سے سیکھا

زہرا نگاہ