سلطان اطہر

 پُر اِنتشار ، کیفیتِ گومگو میں ہیں

ہم بے قرار ، کیفیتِ گومگو میں ہیں

مُضطر ہیں دیکھتے ہُوئے یُوں کاروانِ وقت

بن کر غُبار ، کیفیتِ گومگو میں ہیں

فِطرت سے بھاؤ تاؤ تو کر ہی لیا مگر

لے کے اُدھار ، کیفیتِ گومگو میں ہیں

راہِ فرار کر گئے تھے اختیار جو

وسطِ مدار ، کیفیتِ گومگو میں ہیں

پہلے تو آئے سامنے خم ٹھونکتے ہُوئے

اب میرے یار، کیفیتِ گومگو میں ہیں

یا رب ! نکال کش مکشِ دو جہان سے

پروردگار ! کیفیتِ گومگو میں ہیں

اطہؔر ہمارا تُم سے نہ مِل پاۓ گا مزاج

ہم بے شُمار ، کیفیتِ گومگو میں ہیں

سلمان اطہر