اِس ضبطِ بے مثال پہ شاباش دیجیے
مجھ کو مرے کمال پہ شاباش دیجیے
میرا خیال تھا کہ نبھائے گا عمر بھر
مجھ کو مرے خیال پہ شاباش دیجیے
بھر ہی گیا ہے زخمِ جدائی بھی دیکھیے
اب مجھ کو اندمال پہ شاباش دیجیے
رقصِ کُناں اڑائی ہے پتھر پہ دھول وہ
مجھ کو مری دھمال پہ شاباش دیجیے
مجھ کو قدم قدم پہ جو دیتا رہا فریب
دلبر کی چال چال پہ شاباش دیجیے
میں کہہ رہا ہوں اس کو سرِ عام بے وفا
مجھ کو مری مجال پہ شاباش دیجیے
مدت کے بعد اس نے یہ پوچھا کہ ، ٹھیک ہوں؟
اب اُس کے اِس سوال پہ شاباش دیجیے
اشفاق احمد صائم
No comments:
Post a Comment