سرور جاوید

 یوم پیدائش 22 فروری 1947

کون جانے وہ رخ مہر کہاں روشن تھا

قریہء عشق میں امکانِ زیاں روشن تھا

اس لئے خواہش تعبیر نہیں ہے ہم کو

خواب جو چھوڑ گیا دل پہ نشاں روشن تھا

پھر بھی بستی سے اندھیرا نہیں چھٹنے پاتا

گرچہ کار سحر شیشہ گراں روشن تھا

کیا زمانہ ہے کہ بے رنگ ہے فصلِ گل بھی

وہ بھی لمحے تھے کہ جب دور خزاں روشن تھا

جس کو سوچا تھا عقیدت سے خداؤں کے لیے

وہ چراغ آج سرِ طاقِ بتاں روشن تھا

سرور جاوید