کاوش بدری

 یوم پیدائش 03 فروری 1928

دوست جتنے بھی تھے مزار میں ہیں

غالباً میرے انتظار میں ہیں

وہ نہ ہوتے مرا وجود نہ تھا

میں نہ ہوتا وہ کس شمار میں ہیں

شاخ ادراک میں جو کانٹے ہیں

پھول بننے کے انتظار میں ہیں

کیا سبب ہے کہ ایک موسم میں

کچھ خزاں میں ہیں کچھ بہار میں ہیں

ایک شاعر بنا خدائے سخن

جو رسول سخن تھے غار میں ہیں

خار سمجھو نہ تم انہیں ہرگز

سانپ کے دانت گل کے ہار میں ہیں

شمر و فرعون کب ہوئے مرحوم

ان کے اوصاف رشتے دار میں ہیں

سب کے سب کاوش فرشتہ خصال

عیب جتنے ہیں خاکسار میں ہیں

کاوش بدری