فاروق جائسی

یوم پیدائش 08 جولائی 1952

حسرت ہو تمناؤں کا سیلاب ہو کیا ہو 

تم زندہ حقیقت ہو کوئی خواب ہو کیا ہو 

جذبے کی صداقت ہو کہ احساس کی خوشبو 

تم شہر محبت کا حسیں باب ہو کیا ہو 

قدموں کی بھی آہٹ میں ہے اک ساز کی آواز 

بربط ہو کہ وینا ہو کہ مضراب ہو کیا ہو 

اے وعدۂ فردا کے سمندر مرے حق میں 

کشتی ہو کہ ساحل ہو کہ گرداب ہو کیا ہو 

مل جاؤ جسے اس کا چمک جائے مقدر 

تم ظل ہما ہو پر سرخاب ہو کیا ہو 

تم آؤ مرے گھر تو بتاؤ کہ سر فرش 

مخمل ہو کہ اطلس ہو کہ کمخواب ہو کیا ہو 

فاروقؔ کے ہاتھ آئے نہ تم ہو کے بھی نزدیک 

خوشبو ہو کہ سایہ ہو کہ سیماب ہو کیا ہو

فاروق جائسی