شکیل حنیف

یوم پیدائش 05 سپتمبر 1979

انجان راستوں پہ بھی چلنا پڑا مجھے

نا چاہتے ہوئے بھی بدلنا پڑا مجھے

دل تو نہیں تھا پھر بھی نزاکت تھی وقت کی

موجِ بلا کے ساتھ اچھلنا پڑا مجھے

ہاں خون کھولتا تھا مگر پھر بھی چپ رہا 

اپنے لہو کی آگ میں جلنا پڑا مجھے

باہر رواں ہے موت کا سیلاب تھا پتہ

بچوں کی بھوک دیکھ نکلنا پڑا مجھے

کچھ اس طرح سے اس نے محبت سے بات کی

انکار کرتے کرتے پگھلنا پڑا مجھے

جو دل میں تھا شکیل وہ لب پر بھی آگیا

رازِ وصالِ یار اگلنا پڑا مجھے

شکیل حنیف