بدر جمیل

یوم پیدائش 02 اکتوبر 1946

پہلے تو کبھی وقت یہ ہم پر نہیں آیا 

ہم چلتے رہے چلتے رہے گھر نہیں آیا 

سورج کی ہے بے خبری کہ موسم کی شرارت 

کیوں سایہ مرے قد کے برابر نہیں آیا

کیا لوگ تھے بستی میں کہ جلتی رہی بستی 

اور گھر سے نکل کر کوئی باہر نہیں آیا 

کیوں ولولے محدود ہوئے لفظ و بیاں تک 

کیوں دار تلک کوئی قد آور نہیں آیا 

اس بار بھی کیا یوں ہی گزر جائے گا ساون 

اس بار بھی تو پیڑ پہ پتھر نہیں آیا

بدر جمیل