بیخود موہانی

یوم وفات 27 نومبر 1940

کیوں اے خیال یار تجھے کیا خبر نہیں 

میں کیوں بتاؤں درد کدھر ہے کدھر نہیں 

نشتر کا کام کیا ہے اب اچھا ہے درد دل 

صدقے ترے نہیں نہیں اے چارہ گر نہیں 

کہتی ہے اہل ذوق سے بیتابیٔ خیال 

جس میں یہ اضطراب کی خو ہو بشر نہیں 

ہستی کا قافلہ سر منزل پہنچ گیا 

اور ہم کہا کیے ابھی وقت سفر نہیں 

دیوان گان عشق پہ کیا جانے کیا بنی 

وارفتگیٔ حسن کو اپنی خبر نہیں 

دنیائے درد دل ہے تو دنیائے شوق روح 

ہوں اور بھی جہاں مجھے کچھ بھی خبر نہیں 

صحرائے عشق و ہستئ موہوم و راز حسن 

ان منزلوں میں دل سا کوئی راہبر نہیں 

ہر ذرہ جس سے اک دل مضطر نہ بن سکے 

وہ کوئی اور چیز ہے تیری نظر نہیں 

اس بے دلی سے کہنے کا بیخودؔ مآل کیا 

الفاظ کچھ ہیں جمع معانی مگر نہیں

بیخود موہانی