بسا دے سینے میں ایسی یارب ولائے خیرالوراﷺ کی خوشبو
نفس نفس سے اٹھے ہماری نبیﷺ کے عشق و وفا کی خوشبو
وہی ہیں تحت الثری کی نکہت وہی ہیں عرش علیٰ کی خوشبو
انہیں کے صدقے مہک رہی ہے تمام ارض و سما کی خوشبو
زمین و افلاک و لامکاں ہو مقامِ سدرہ ہو یا جناں ہو
مہک رہی ہے تمام عالم میں سیدالانبیا کی خوشبو
اِنہیں پہ صدقے ہے صبحِ اول انہیں پہ قرباں ہے یومِ آخر
انہیں میں ہے ابتدا کی خوشبو اِنہیں میں ہے انتہا کی خوشبو
یہی وہ شاداب گل ہے جس میں بسی ہے بوئے نویدِ عیسی
اسی شگفتہ گلاب میں ہے خلیلِ حق کی دعا کی خوشبو
بنا ہے معراجؔ دل کا آنگن محبتِ مصطفیٰ کا گلشن
ہماری روحِ رواں پہ قربان ہے بہشتی ہوا کی خوشبو
معراج بنارسی
No comments:
Post a Comment