فوزیہ شیخ

 یوم پیدائش 15 جولائی 1982

پھر اک خوشی سے کیا اس نے ہمکنار مجھے

وہ کھینچ لے گیا دریائے غم کے پار مجھے

چراغ راہ محبت ہوں طاق میں رکھنا

غبار قریۂ نفرت میں مت اتار مجھے

میں اس کی یاد میں راتوں کو سو نہیں سکتی

وہ دور رہ کے بھی رکھتا ہے اشک بار مجھے

کٹی پتنگ سی اٹکی ہوں شاخ نازک پر

ہوا کا ہاتھ بھی کرتا ہے تار تار مجھے

مٹا دے مجھ کو یا رکھ لے سمیٹ کر دل میں

تو ہجر جیسی اذیت سے مت گزار مجھے

تو جانتا ہے کہ میں بے گھری سے ڈرتی ہوں

نکال دل سے نہ ایسے تو بار بار مجھے

میں انتظار کے برزخ میں جلتی رہتی ہوں

ہزار وسوسے رکھتے ہیں بے قرار مجھے

میں چاہتی ہوں اسے بھولنا مگر فوزیؔ

قسم خدا کی نہیں خود پہ اختیار مجھے

فوزیہ شیخ