اختر علیم سید

 یوم پیدائش 02 فروری 1952

کمالِ شوق یہی ہے تو با کمال ہیں ہم

ملے بغیر بھی آسودہءِ وصال ہیں ہم

رعایتیں ہمیں حاصل تھیں پیش دستی کی

اسے یقین تھا شائشتہِ جمال ہیں ہم

ہمیں نے ظلمتِ شب سے سحر تراشی ہے

ہمیں مثال بناؤ کہ بے مثال ہیں ہم

وہ جانتے ہیں جو علمِ شناخت رکھتے ہیں

ہمارے جیسے ہزاروں ہیں خال خال ہیں ہم

ستم تو یہ ہے کہ اپنی کبھی سنی ہی نہیں

خود آپ اپنے لئے جان کا وبال ہیں ہم

کچھ اس طرح ہمیں سلجھا رہا ہے وہ اختر

کہ جیسے الجھا ہوا سا کوئی سوال ہیں ہم

اختر علیم سید