ثناء اللہ ظہیر

یوم وفات 10 جون 2022

خود میں اترے اور طغیانی سے باہر آ گئے 

آ کے گہرائی میں ہم پانی سے باہر آ گئے 

اس کی رونق میں بہت سنسان سے لگتے تھے ہم 

شہر سے نکلے تو ویرانی سے باہر آ گئے 

لفظ وہ جن کو زباں تک لانے کی ہمت نہ تھی 

آخر اک دن میری پیشانی سے باہر آ گئے 

دم بخود اس حسن کو ہی دیکھتے رہتے تھے ہم 

یوں برت ٹوٹا کہ حیرانی سے باہر آ گئے 

آستیں میں پل رہے تھے لیکن اک دن یوں ہوا 

سانپ آپس کی پریشانی سے باہر آ گئے 

وہ تعلق ہم کو قید خواب جیسا تھا ظہیرؔ 

کھل گئیں آنکھیں تو آسانی سے باہر آ گئے

ثناء اللہ ظہیر