جو غم نہ ہوتا تو کیا لذتِ خوشی ہوتی
بجز نفس کے یہ بے کیف زندگی ہوتی
نہ ہوتا بلبلِ دل سوختہ کو گل کا خیال
نگاہ روئے خزاں پر نہ جو جمی ہوتی
بجا کیا جو چھپا رکھا یوں زمانے سے
ظہورِ عشق جو ہوتا تو پھر ہنسی ہوتی
سمجھ ہی لیتا زمانہ جو رازِ الفت تو
نہ بر تری نہ ہی احساسِ کمتری ہوتی
بجھا بجھا سا ہے کیوں جانے زخمِ دل کا چراغ
لہو پلاتے تو کچھ دیر روشنی ہوتی
خزاں نے لوٹا نہ ہوتا اگر چمن آفاقؔ
لبوں پہ غنچئہ دل سوز کے ہنسی ہوتی
آفاق مرزا آفاق
No comments:
Post a Comment