شان مصباحی

یوم پیدائش 10 جولائی 1998

ذرا سی بات پہ آنکھیں وہ اشکبار کرے

مناوں لاکھ مگر پھر بھی ہا ہا کار کرے

سمجھ نہ پائے گا قیمت وہ عشق کی ہرگز

جو نام عشق پہ بس اپنا کاروبار کرے

میں منتظر ہوں اسی کا جو ایک مدت سے

نظر چُرا کے مرے دل کو بیقرار کرے

جو بار بار ستم کرتا ہے اسی پر کیوں

یہ نامراد بھلا اپنی جاں نثار کرے

یہ ملکیت ہے کسی اور کی مگر یارو

فقط وہ دل کا مرے خود کو دعویدار کرے

میں جس قدر ہوں ترے انتظار میں بےچین

خدا کرے کہ مرا تو بھی انتظار کرے

عزیز بن کے جو دھوکے سے زہر دیتا ہے

تو ایسے شخص پہ کیا کوئی اعتبار کرے

نہ اس طرح مرے دل کو دکھایا کر ہمدم

کہ تیرا لہجہ مرے دل کو تار تار کرے۔

بھلا سکا نہ اُسے چاہ کر بھی دل, لیکن

اُسے بھلانے کی کوشش تو بار بار کرے

خدا کی ذات پہ چھوڑا ہے اپنی ہستی کو

ڈبو دے میرا سفینہ یا پھر وہ پار کرے

تجھے اے شان سدا اس سے بچ کے رہنا ہے

جو قاتلانہ نگاہوں سے تجھ پہ وار کرے

شان مصباحی