غارت گری حیات کا عنواں ہے آجکل
ہر سانس ایک خنجر بُرّاں ہے آجکل
پھر اقتدار وقت زلیخا کے ساتھ ہے
پھر ابتلا میں یوسفِ کنعاں ہے آجکل
گونگے غزل سرا ہیں بہر گام بزم میں
پھر قفل بر زبانِ سخنداں ہے آجکل
بہکی ہوئی نگاہِ محبت ہے قیس کی
بھٹکا ہوا تصورِ جاناں ہے آجکل
ہر جہل مانگتا ہے خراجِ سلام علم
ہر خار و خس بہار پہ خنداں ہے آجکل
ہر شب کو ادعائے سحر ہے خدا کی شان
ہر چور اک عظیم نگہباں ہے آجکل
کمال سالارپوری
No comments:
Post a Comment