مشتاق انجم

یوم پیدائش 31 اگست 1955

قہقہے کی موت ہے یا موت کی آواز ہے 

سسکیاں لیتا ہوا اب زندگی کا ساز ہے 

ایک سایہ لڑکھڑاتا آ رہا ہے اس طرف 

دیکھیے تو اک حقیقت سوچئے تو راز ہے 

ریت میں منہ ڈال کر سانسوں کا اس کا روکنا 

چند سکوں کے لئے بچہ بڑا جانباز ہے

سوچ کی منزل کہیں ہے اور آنکھیں ہیں کہیں 

جانتا ہوں کس میں کتنی قوت پرواز ہے 

کس طرح ہوگا بیاں حال دل بیمار اب 

آسماں برہم ہے اور خاموش چارہ ساز ہے 

دور آیا ہے عجب انجمؔ یہاں ہشیار باش 

زاغ ہے مخدوم اور خادم یہاں شہباز ہے 

مشتاق انجم