اقبال احمد قمر

یوم پیدائش 04 اکتوبر 1959

بات بن جانے کا امکان بھی ہو سکتا ہے 

مسئلہ کہنے سے آسان بھی ہو سکتا ہے 

آپ جس بات کو معمولی سمجھ بیٹھے ہیں 

کوئی اس بات پہ حیران بھی ہو سکتا ہے 

ایک سرگوشی تناور بھی تو ہو سکتی ہے 

تیری ہر بات کا اعلان بھی ہو سکتا ہے 

گمرہی میں جو مری راہبری کو آیا

خود وہ بھٹکا ہوا انسان بھی ہو سکتا ہے 

پیش بندی اسے تم کہتے ہو میری لیکن 

بخدا یہ مرا وجدان بھی ہو سکتا ہے 

تم نے لفظوں میں جو ٹانکا ہے نگینے کی طرح 

وہ کسی اور کا فرمان بھی ہو سکتا ہے 

میرے رستے ہی مری تجربہ گاہیں ہیں قمرؔ 

گرچہ ان راہوں میں نقصان بھی ہو سکتا ہے

اقبال احمد قمر