تشنہ بریلوی

یوم پیدائش 20 نومبر 1931

چمن میں برق کبھی آشیاں سے دور نہیں 

زمیں پہ ہم ہیں مگر آسماں سے دور نہیں 

جگا سکو تو جگاؤ کہ ناخدا دیکھے 

طواف موج بلا بادباں سے دور نہیں 

یہ عالم بشریت بکھرنے والا ہے 

کوئی مکان بھی اب لا مکاں سے دور نہیں 

قریب آ نہ سکا میں ترے مگر خوش ہوں 

کہ میرا ذکر تری داستاں سے دور نہیں 

ذرا سی اور مہارت ہو تیر زن کو عطا 

نشانہ اب مرے دل کے نشاں سے دور نہیں 

یہ ہے دوام کی منزل کہ ہے فنا کا کھنڈر 

یہ راز آج مرے رخش جاں سے دور نہیں 

میں اپنے دل کا فسانہ لکھوں تو کیوں نہ لکھوں 

کہ قصہ گوئی میں میں موپساںؔ سے دور نہیں 

نہ کر اے تشنہ مدارات میں تکلف کچھ 

کہ گھر کا حال ترے میہماں سے دور نہیں

تشنہ بریلوی