سیدہ نسرین نقاش

یوم پیدائش 30 نومبر 1963

ہم نے ہونٹوں پہ تبسم کو سجا کر دیکھا 

یعنی زخموں کو پھر اک بار ہرا کر دیکھا 

ساری دنیا میں نظر آنے لگے تیرے نقوش 

پردہ جب چشم بصیرت سے اٹھا کر دیکھا

دور پھر بھی نہ ہوئی قلب و نظر کی ظلمت 

ہم نے خوں اپنا چراغوں میں جلا کر دیکھا 

اپنا چہرہ نظر آیا مجھے اس چہرے میں 

اس کے چہرے سے جو چہرے کو ہٹا کر دیکھا 

وہ تعلق تری اک ذات سے جو تھا مجھ کو 

اس تعلق کو بہر حال نبھا کر دیکھا 

برف ہی برف نظر آتی ہے تا حد نظر 

زندگی ہم نے تری کھوج میں جا کر دیکھا 

جاوداں ہو گیا ہر نغمۂ پر درد مرا 

میرے ہونٹوں سے زمانے نے چرا کر دیکھا 

سیدہ نسرین نقاش