انور اداس

یوم پیدائش 01 جنوری 1956

یُوں سناں کی نوک پر ہے ایک سر رکھّا ہُوا

جس طرح سُورج ہو کوئی بام پر رکھّا ہُوا

ہے عجب ہی شخص وہ دُشمن سمجھتا ہے اُسے

جس کے ہاتھوں میں ہے کوئی بھی ہُنر رکھّا ہُوا

قدغنیں اُس نے لگا رکھّیں ہیں اپنے شہر میں

اِس طرح ہے اُس نے خُود کو معتبر رکھّا ہُوا

ساحلوں پر منتظر لوگوں نے جانے کِس لیے

باندھ کر ہے میرے پاؤں سے بھنور رکھّا ہُوا

مت سمجھ ٹھہرے ہُوئے پانی کو اِتنا پُر سکوں

اِس کی خاموشی میں بھی ہے شوروشر رکھّا ہُوا

اُس کا چہرہ ہے چھُپا کالی گھٹا کی اوٹ میں

یا سیاہ زُلفوں میں ہے کوئی قمر رکھّا ہُوا

وہ مِرے دِل سے کبھی بھی محو ہو سکتا نہیں

میں نے اُس کی یاد کو ہے ہمسفر رکھّا ہُوا

جانتا ہے پتھّروں کے شہر کا باسی ہے وہ

پھر بھی انورؔ اُس نے ہے شیشے کا گھر رکھّا ہُوا

انور اداس