ریاض حنفی

 یوم پیدائش 08 مارچ 1963 

کسی گاؤں کا اک سنسان رستہ ہو گیا ہوں 

گئے ہیں آپ جب سے میں اکیلا ہو گیا ہوں 

بچایا ہے بہت سے ڈوبنے والوں کو میں نے 

کبھی ساحل کبھی دریا کا تنکا ہو گیا ہوں 

مجھے اب لوگ میرے نام سے کم جانتے ہیں 

کسی کا جسم تو چہرہ کسی کا ہو گیا ہوں 

تمہاری یاد کے سورج نے آنکھیں پھیر لی ہیں 

میں دن ہوتے ہوئے بھی شب گزیدہ ہو گیا ہوں 

یہ کس انداز سے دیکھا ہے پیچھے مُڑ کے تم نے 

میں خود اپنی ہی نظروں میں تماشا ہو گیا ہوں 

ریاض حنفی