مظفر حنفی

 یوم پیدائش 01 اپریل 1936

یوں توڑ نہ مدت کی شناسائی ادھر آ

آ جا مری روٹھی ہوئی تنہائی ادھر آ

مجھ کو بھی یہ لمحوں کا سفر چاٹ رہا ہے

مل بانٹ کے رو لیں اے مرے بھائی ادھر آ

اے سیل روان ابدی زندگی نامی

میں کون سا پابند ہوں ہرجائی ادھر آ

اس نکہت و رعنائی سے کھائے ہیں کئی زخم

اے تو کہ نہیں نکہت و رعنائی ادھر آ

اعصاب کھنچے جاتے ہیں اب شام و سحر میں

ہونے ہی کو ہے معرکہ آرائی ادھر آ

سنتا ہوں کہ تجھ کو بھی زمانے سے گلہ ہے

مجھ کو بھی یہ دنیا نہیں راس آئی ادھر آ

میں راہ نماؤں میں نہیں مان مری بات

میں بھی ہوں اسی دشت کا سودائی ادھر آ

مظفر حنفی