ناشاد اورنگ آبادی

 یوم پیدائش 15 جنوری 1935

بھیجتا ہوں آپ کو اپنی پسندیدہ غزل 

تازہ تازہ ناشنیدہ اور نادیدہ غزل 

داستان حسن بھی ہے یہ سراپا حسن بھی 

سنگ مرمر سے مثال بت تراشیدہ غزل 

میرؔ غالبؔ ذوقؔ و مومنؔ پر بھی تھی جاں سے نثار 

تھی بہادر شاہ کی ہر چند گرویدہ غزل 

شہرۂ آفاق ہے اس کا جمال فکر و فن 

ساری اصناف سخن میں ہے جہاں دیدہ غزل 

پارہ پارہ ہو نہ جائے ماہ پارہ دیکھیے 

ہے ہوس ناکوں کے ہاتھوں آج رنجیدہ غزل 

شعر کی آمد نہیں ہوتی ہے کیا ناشادؔ اب 

شاعران‌ عصر تو کہتے ہیں پیچیدہ غزل

ناشاد اورنگ آبادی