رشید احمد

 یوم پیدائش 01 جنوری 1959

آئینہ توڑ کے حیرت میں پڑا رہتا ہوں

عکس چننے کی جسارت میں پڑا رہتا ہوں 

ایک منظر میں کئی روپ نظر آتے ہیں

کبھی وحدت کبھی کثرت میں پڑا رہتا ہوں

دن تو دفتر میں کسی طور گزر جاتا ہے 

رات زخموں کی اذیت میں پڑا رہتا ہوں

دوست آتے ہیں تو رونق بھی چلی آتی ہے

ورنہ میں درد کی حالت میں پڑا رہتا ہوں

ایک بھی لمحہ میں غافل نہیں ہوتا تم سے

ہر گھڑی ایک مشقت میں پڑا رہتا ہوں

کیسے احباب مرے دکھ کا مداوا کرتے

دھوپ نکلے بھی تو ظلمت میں پڑا رہتا ہوں

رشید احمد