ہارون ایاز قادری

 یوم پیدائش 30 مارچ 1953

بنامِ عشق ترا غم شناس رہتے ہوئے

میں مطمئن بھی بہت ہوں اداس رہتے ہوئے

کبھی تو کھل کے ملو اور ٹوٹ کر برسو

ہو کتنی دور مرے آس پاس رہتے ہوئے

وہ راز مجھ پہ مری بیخودی نے کھول دیا

جو جان پایا نہ ہوش وحواس رہتے ہوئے

یہ انتظار مجھے کیوں گراں گزرتا ہے

رفیقِ جاں ترے ملنے کی آس رہتے ہوئے

دمک رہی ہے جوانی ، چمک رہا ہے شباب

برہنگی ہے یہ کیسی لباس رہتے ہوئے

ایاز میرے لیے حسنِ آگہی تھا بہت

خدا شناس رہا خود شناس رہتے ہوئے

ہارون ایاز قادری