خاور کمال صدیقی

 یوم پیدائش 12 اپریل 1965

 سب نے اپنی نظر سے دیکھا ہے

ہم نے چشمانِ تر سے دیکھا ہے

رونقوں کا زوال ہوتے ہوئے

روشنی کے نگر سے دیکھا ہے

اس کے وعدے تو بس دلاسے تھے

پھل ملا کیا شجر سے دیکھا ہے

کوئی تو بات یہ بتائے ذرا

کچھ بچا ان کے شر سے دیکھا ہے؟

کوئی منزل ملی نہ راہ نما

لوٹ کے ہر سفر سے دیکھا ہے

اس کا اقرار دل لگی ٹھہرا

کتنا کچھ بازی گر سے دیکھا ہے

ایک تیرہ شبی کا عالم بھی

دن ڈھلے تک سحر سے دیکھا ہے

رنج و آلام کا مداوا کبھی

شہر کے چارہ گر سے دیکھا ہے؟

اس سے باندھو وفا کی امیدیں

جس نے غائر نظر سے دیکھا ہے

خاور کمال صدیقی