محب وفا

 یوم پیدائش 26 اپریل 1984

ہجر ہے یاس ہے وحشت کا سماں ہے میں ہوں 

عمر ٹھہرے ہوئے موسم میں رواں ہے میں ہوں 

میرے دامن میں جو گنجینۂ گل ہے تو ہے 

تیرے دامن میں جو اک برگ خزاں ہے میں ہوں 

از زمیں تا بہ فلک رات کا سناٹا ہے 

ایسے عالم میں جو یہ شور فغاں ہے میں ہوں 

دیکھ ہجراں میں خیالات پریشاں کا فسوں 

جا بجا عکس ترا رقص کناں ہے میں ہوں 

طاق ہر شام پہ جلتی ہوئی امید ہے تو 

یہ جو بجھتی ہوئی حسرت کا دھواں ہے میں ہوں 

چشم صد ناز ہے پیکان ستم ہے تو ہے 

اور اک زخم جگر جان ستاں ہے میں ہوں 

برف جذبات کی پگھلی ہے مری حدت سے 

اندروں تیرے جو اک شعلہ فشاں ہے میں ہوں

محب وفا