منان بجنوری

یوم پیدائش 15 جولائی 1969

حیات کیا ہے یہ جانا برے حوالوں سے

رہا ہے واسطہ اپنا تباہ حالوں سے

کبھی تو یوں بھی ہوا جگنوؤں کے پاؤں پڑے

ہوئے ہیں خوار بہت روٹھ کر اجالوں سے

مزا تو جب ہے مخالف سے دوستی ٹھہرے

یہ کیا کہ دشمنی رکھتے ہو ہم خیالوں سے

بڑا وہی ہے جو چھوٹا بھی ہے کہیں نہ کہیں 

وجود الگ ہی نہیں ماموؤں کا سالوں سے

کوئ خبر بھی ہے کب گاؤں واپس آئیں گے لوگَ

کواڑ پوچھتے رہتے ہیں گھر کے تالوں سے

نئے جہاں میں تقاضے ہیں منزلوں کے نئے 

ہے ختم رشتہءِ پا اب سفر کے چھالوں سے 

نہ سمجھے کہدو فقط خود کو با کمال کوئی 

ہر ایک شہر ہے معمور با کمالوں سے 

غم آشنا ہی نہیں جس نے میرے نالوں کی

بجائے ندیوں کے دی ہے مثال نالوں سے 

عجب تو یہ ہے وہ خود کم نہ تھے پلے ہیں جہاں 

شکایتیں ہیں جنھیں آستیں کے پالوں سے

روا نہیں ہے سپاہِ قلم کو تلخ کلام 

گریز چاہئے منان تیغ بھا لوں سے

منان بجنوری