رسوا کرے مجھے کہ اسیرِ بلا کرے
جو چاہے وہ میرا دل درد آشنا کرے
راضی ہو میں وہ قتل کرے یا جفا کرے
بس میں کسی کے دل نہ کسی کو خدا کرے
موسیٰ نہ تاب لائے تبسم کی ایک دن
میں چاہتا ہوں روز یہ بجلی گرا کرے
میری طرح کا دل نہ کسی کو نصیب ہو
انکی طرح جواں نہ کسی کو خدا کرے
مقصود امتحاں مری ہمت کا ہے اگر
ہر روز آشیانہ پہ بجلی گرا کرے
بے کھٹکے آؤ حشر میں الٹے ہوئے نقاب
کس کی مجال ہے، جو تمہارا گلا کرے
ہاں! مسکرا کے ناز سے انگڑائی لیجیے
بجلی کسی کے دل پہ گرے تو گرا کرے
جس دل کی، شمسؔ! کوئی نہ حسرت نکل سکے
مر جائے وہ غریب تو آخر وہ کیا کرے
محمد باقر شمس
No comments:
Post a Comment