مراق مرزا

یوم پیدائش 24 دسمبر 1962

مشکل تری اڑان ہے سورج نظر میں رکھ 

تاریک آسمان ہے سورج نظر میں رکھ 

جانا ہے روشنی کی طرف لوٹ کر تجھے 

دو پل کا یہ جہان ہے سورج نظر میں رکھ 

بے رنگ اس کے پھول ہیں بے نور ہر شجر 

جنگل یہ گلستان ہے سورج نظر میں رکھ 

یہ ارض بے ثبات ہے ہر موڑ پر یہاں 

ظلمت کا ارسلان ہے سورج نظر میں رکھ 

ہر رہ گزر میں ظلم و ستم کا ہی راج ہے 

یہ شہر بے امان ہے سورج نظر میں رکھ 

دنیا پل صراط سے کچھ کم نہیں مراقؔ 

ہر پل اک امتحان ہے سورج نظر میں رکھ

مراق مرزا