بدر شمسی

یوم پیدائش 15 مارچ 1930

یوں بچھڑ جاؤں گا تجھ سے میں نے یہ سوچا نہ تھا

قربتوں میں فاصلوں کا کوئی اندازہ نہ تھا

جانے پہچانے ہوئے چہرے بھی سب تھے اجنبی

کتنا تنہا تھا وہاں بھی میں جہاں تنہا نہ تھا

اپنے دل کا زہرِغم آنکھوں سے جو چھلا گیا

وہ سمندر تھا مگر میری طرح گہرا نہ تھا

زندگی ہم بھی تری قدروں کے وارث تھے مگر

اپنی قسمت میں فقط دیوار تھی سایا نہ تھا

روٹھنے والے مری چاہت کا اندازہ تو کر

اس قدر تو میں نے خود کو بھی کبھی چاہا نہ تھا

زخم بھی جس نے دیئے ہیں مجھ کو غیروں کی طرح

وہ مرا اپنا تھا لیکن مجھ کو پہچانا نہ تھا

پیار آخر کیوں نہ آتا اپنے قاتل پر مجھے

میرے اس کے درمیاں کیا خون کا رشتا نہ تھا

بے وفائی کی شکایت تھی مجھے اس سے مگر

اس کی مجبوری کو جب تک بدر میں سمجھا نہ تھا

بدر شمسی