بیخود دہلوی

 یوم پیدائش 21 مارچ 1863

دے محبت تو محبت میں اثر پیدا کر

جو ادھر دل میں ہے یا رب وہ ادھر پیدا کر

دود دل عشق میں اتنا تو اثر پیدا کر

سر کٹے شمع کی مانند تو سر پیدا کر

پھر ہمارا دل گم گشتہ بھی مل جائے گا

پہلے تو اپنا دہن اپنی کمر پیدا کر

کام لینے ہیں محبت میں بہت سے یا رب

اور دل دے ہمیں اک اور جگر پیدا کر

تھم ذرا اے عدم آباد کے جانے والے

رہ کے دنیا میں ابھی زاد سفر پیدا کر

جھوٹ جب بولتے ہیں وہ تو دعا ہوتی ہے

یا الٰہی مری باتوں میں اثر پیدا کر

آئینہ دیکھنا اس حسن پہ آسان نہیں

پیشتر آنکھ مری میری نظر پیدا کر

صبح فرقت تو قیامت کی سحر ہے یا رب

اپنے بندوں کے لیے اور سحر پیدا کر

مجھ کو روتا ہوا دیکھیں تو جھلس جائیں رقیب

آگ پانی میں بھی اے سوز جگر پیدا کر

مٹ کے بھی دوری گلشن نہیں بھاتی یا رب

اپنی قدرت سے مری خاک میں پر پیدا کر

شکوۂ درد جدائی پہ وہ فرماتے ہیں

رنج سہنے کو ہمارا سا جگر پیدا کر

دن نکلنے کو ہے راحت سے گزر جانے دے

روٹھ کر تو نہ قیامت کی سحر پیدا کر

ہم نے دیکھا ہے کہ مل جاتے ہیں لڑنے والے

صلح کی خو بھی تو اے بانئ شر پیدا کر

مجھ سے گھر آنے کے وعدے پر بگڑ کر بولے

کہہ دیا غیر کے دل میں ابھی گھر پیدا کر

مجھ سے کہتی ہے کڑک کر یہ کماں قاتل کی

تیر بن جائے نشانہ وہ جگر پیدا کر

کیا قیامت میں بھی پردہ نہ اٹھے گا رخ سے

اب تو میری شب یلدا کی سحر پیدا کر

دیکھنا کھیل نہیں جلوۂ دیدار ترا

پہلے موسیٰ سا کوئی اہل نظر پیدا کر

دل میں بھی ملتا ہے وہ کعبہ بھی اس کا ہے مقام

راہ نزدیک کی اے عزم سفر پیدا کر

ضعف کا حکم یہ ہے ہونٹ نہ ہلنے پائیں

دل یہ کہتا ہے کہ نالے میں اثر پیدا کر

نالے بیخودؔ کے قیامت ہیں تجھے یاد رہے

ظلم کرنا ہے تو پتھر کا جگر پیدا کر

بیخود دہلوی

شمشاد شاؔد

 یوم پیدائش کی مبارک باد

21م مارچ ۔۔۔۔

دُکھوں کو ایڑ لگاتے ہیں غم سے کھیلتے ہیں

وہ جیتتے ہیں جو لوح و قلم سے کھیلتے ہیں

نہ جانے کس لئے اہلِ کرم سے کھیلتے ہیں

زمانے والے دلِ محترم سے کھیلتے ہیں

یہی رواج ہے شہرِ ستم کا صدیوں سے

جو شاد ہیں وہ اسیرانِ غم سے کھیلتے ہیں

قسم ہے ان کی قسم کا یقین مت کرنا

منافقین خدا کی قسم سے کھیلتے ہیں

مخالفین میں یہ بات مشتہر کر دو

ہے مات ان کی یقینی جو ہم سے کھیلتے ہیں

کہ اپنے اپنے عقیدوں کو طاق پر رکھ کر

جنابِ شیخ و برہمن دھرم سے کھیلتے ہیں

اے شاؔد رنج و الم کا نہیں ہے خوف ہمیں

ہم ابتدا ہی سے رنج و الم سے کھیلتے ہیں

شمشاد شاؔد

جاوید اقبال

 یوم پیدائش 20 مارچ 

بظاہر زیست سے شکوہ نہیں ہے 

ہے سب اچھا مگر، اچھا نہیں ہے 

میں کیسی بستیوں میں آگیا ہوں 

یہاں دیواریں ہیں، سایہ نہیں ہے 

فقط گھنٹی سے ہی پہچانتا ہوں 

تِرا ہے فون یا تیرا نہیں ہے

زمین و آسماں دھندلے پڑے ہیں 

یہ آنسو آنکھ سے گرتا نہیں ہے 

یہ سچ ہے میرا برتاؤ ہے بدلا

مگر تُو بھی تو پہلے سا نہیں ہے

جو سوچا رات بھر تجھ کو، لگا یہ

مِرا چہرہ تھا جو، میرا نہیں ہے 

جاوید اقبال

سرسوتی سرن کیف

 یوم پیدائش 20مارچ 1922

ستم گر تجھ سے ہم کب شکوۂ بیداد کرتے ہیں

ہمیں فریاد کی عادت ہے ہم فریاد کرتے ہیں

متاع زندگانی اور بھی برباد کرتے ہیں

ہم اس صورت سے تسکین دل ناشاد کرتے ہیں

ہواؤ ایک پل کے واسطے للہ رک جاؤ

وہ میری عرض پر دھیمے سے کچھ ارشاد کرتے ہیں

نہ جانے کیوں یہ دنیا چین سے جینے نہیں دیتی

کوئی پوچھے ہم اس پر کون سی بیداد کرتے ہیں

نظر آتا ہے ان میں بیشتر اک نرم و نازک دل

مصائب کے لیے سینے کو جو فولاد کرتے ہیں

خدا کی مصلحت کچھ اس میں ہوگی ورنہ بے حس بت

کسے شاداں بناتے ہیں کسے ناشاد کرتے ہیں

نہیں دیکھا کہیں جو ماجرائے عشق میں دیکھا

کہ اہل درد چپ ہیں چارہ گر فریاد کرتے ہیں

اسیر دائمی گر دل نہ ہو تو اور کیا ہو جب

کہیں وہ مسکرا کر جا تجھے آزاد کرتے ہیں

کیا ہوگا کبھی آدم کو سجدہ کہنے سننے سے

فرشتے اب کہاں پروائے آدم زاد کرتے ہیں

ہمیں اے دوستو چپ چاپ مر جانا بھی آتا ہے

تڑپ کر اک ذرا دل جوئی صیاد کرتے ہیں

بہت سادہ سا ہے اے کیفؔ اپنے غم کا افسانہ

وہ ہم کو بھول بیٹھے ہیں جنہیں ہم یاد کرتے ہیں

سرسوتی سرن کیف

سیف الدین سیف

 یوم پیدائش 20 مارچ 1922

مری داستان حسرت وہ سنا سنا کے روئے

مرے آزمانے والے مجھے آزما کے روئے

کوئی ایسا اہل دل ہو کہ فسانۂ محبت

میں اسے سنا کے روؤں وہ مجھے سنا کے روئے

مری آرزو کی دنیا دل ناتواں کی حسرت

جسے کھو کے شادماں تھے اسے آج پا کے روئے

تری بے وفائیوں پر تری کج ادائیوں پر

کبھی سر جھکا کے روئے کبھی منہ چھپا کے روئے

جو سنائی انجمن میں شب غم کی آپ بیتی

کئی رو کے مسکرائے کئی مسکرا کے روئے

سیف الدین سیف

شیر سنگھ ناز دہلوی

 یوم پیدائش 19 مارچ 1898

دم اخیر بھی ہم نے زباں سے کچھ نہ کہا

جہاں سے اٹھ گئے اہل جہاں سے کچھ نہ کہا

چلی جو کشتئ عمر رواں تو چلنے دی

رکی تو کشتئ عمر رواں سے کچھ نہ کہا

خطائے عشق کی اتنی سزا ہی کافی تھی

بدل کے رہ گئے تیور زباں سے کچھ نہ کہا

بلا سے خاک ہوا جل کے آشیاں اپنا

تڑپ کے رہ گئے برق تپاں سے کچھ نہ کہا

گلہ کیا نہ کبھی ان سے بے وفائی کا

زباں تھی لاکھ دہن میں زباں سے کچھ نہ کہا

خوشی سے رنج سہے نازؔ عمر بھر ہم نے

خدا گواہ کبھی آسماں سے کچھ نہ کہا

شیر سنگھ ناز دہلوی

محشر حبیبی

 یوم پیدائش 19 مارچ 1946

چاند تارے یہ رہگزر مانوس 

جس سفر سے ہیں ہم سفر مانوس 

اُن سے کتنا پرانا رشتہ ہے 

پتھروں سے ہمارے سر مانوس 

موت کا بھی مزا چکھیں گے ہم 

زندگی سے ہیں سانس بھر مانوس 

حادثوں سے ہے کون اب محفوظ 

آنسوؤں سے ہیں سارے گھر مانوس 

دوستی صرف اُن سے رکھتا ہوں 

جن کے شانوں سے ہے یہ سر مانوس 

میرا دُکھ کیا ہے آپ کیا جانیں 

آپ مجھ سے ہیں آنکھ بھر مانوس 

خامشی ٹھیک ہے مگر اے دوست 

شور محشر سے میرا گھر مانوس

محشر حبیبی

ارشد صدیقی

 یوم پیدائش 19 مارچ 1923

قلب و نظر کا سکوں اور کہاں دوستو

کوئے بتاں دوستو کوئے بتاں دوستو

میرا ہی دل ہے کہ میں پھرتا ہوں یوں خندہ زن

کم نہیں پردیس میں دل کا زیاں دوستو

جن میں خلوص وفا اور نہ شعور ستم

مجھ کو بٹھایا ہے یہ لا کے کہاں دوستو

چار گھڑی رات ہے آؤ کہ ہنس بول لیں

جانے سحر تک ہو پھر کون کہاں دوستو

ربط مراسم کے بعد ترک تعلق غلط

آگ بجھانے سے بھی ہوگا دھواں دوستو

لاکھ چھپو سایۂ گیسوئے شب رنگ میں

مل نہیں سکتی مگر غم سے اماں دوستو

شاعر ارشدؔ ہوں میں شاعر فطرت ہوں میں

مٹ نہیں سکتا مرا نام و نشاں دوستو

ارشد صدیقی

اعتبار ساجد

 تجھ سے لفظوں کانہیں، روح کارشتہ ہے مرا

تو مری سانس میں تحلیل ہے خوشبو کی طرح

اعتبار ساجد

یاسمین حمید

 یوم پیدائش 18 مارچ 1951

پردہ آنکھوں سے ہٹانے میں بہت دیر لگی

ہمیں دنیا نظر آنے میں بہت دیر لگی

نظر آتا ہے جو ویسا نہیں ہوتا کوئی شخص

خود کو یہ بات بتانے میں بہت دیر لگی

ایک دیوار اٹھائی تھی بڑی عجلت میں

وہی دیوار گرانے میں بہت دیر لگی

آگ ہی آگ تھی اور لوگ بہت چاروں طرف

اپنا تو دھیان ہی آنے میں بہت دیر لگی

جس طرح ہم کبھی ہونا ہی نہیں چاہتے تھے

خود کو پھر ویسا بنانے میں بہت دیر لگی

یہ ہوا تو کہ ہر اک شے کی کشش ماند پڑی

مگر اس موڑ پہ آنے میں بہت دیر لگی

یاسمین حمید