ملک شجاع شاذ

 یوم پیدائش 01 مئی 1977

طے شدہ عشق سرِ دار نبھانا ہو گا

جو بھی لکھا ہے مرے یار نبھانا ہو گا

تم نے دیوانے کو ہنستے ہوئے دیکھا ہے کبھی

اب کہانی میں یہ کردار نبھانا ہو گا

وہ جو اک شخص پراسرار نظر آتا ہے

میری وحشت کا خریدار نظر آتا ہے

دلِ درویش صفت شور نہ کر چپ ہو جا

جب تو روتا ہے گنہ گار نظر آتا ہے

یا کسی اور کے ہیں نقش مرے چہرے پر

یا مجھے آئینے کے پار نظر آتا ہے

جب سے میں تیرا طلبگار ہوا ہوں اے دوست

ہر کوئی میرا طلب گار نظر آتا ہے

دکھ تو یہ ہے وہ مرے ساتھ نہیں رہ سکتا

جو مرے ساتھ لگاتار نظر آتا ہے

جو ترے شہر میں بنیادِ محبت تھا شاذ

آج وہ شخص بھی مسمار نظر آتا ہے

ملک شجاع شاذ

اشفاق احمد صائم

 سُکھ چین ، اضطراب سے پہلے کی بات ہے

یہ پیار کے عذاب سے پہلے کی بات ہے

دو سے نکالو ایک تو بچتا تھا ایک ہی

یہ عشق کے حساب سے پہلے کی بات ہے 

پڑھتے رہے وفاؤں کا مطلب خلوص ہم

یہ ہجر کے نصاب سے پہلے کی بات ہے

پہلے میں کہہ رہا تھا فقط پھول ہی تو ہے

تیرے دیے گلاب سے پہلے کی بات ہے

خوشبو طواف کرتی تھی پلکوں کا نصف شب

آنکھوں میں تیرے خواب سے پہلے کی بات ہے

پہلے تکلفات میں ہم ، تم رہا مگر

یہ آپ اور جناب سے پہلے کی بات ہے.

صدیوں خمار کا رہا الزام آنکھ پر

دنیا میں یہ شراب سے پہلے کی بات ہے

اشفاق احمد صائم

ریاض ساغر

 میں ظلمتوں کو چیر کے لایا ہوں روشنی

اس شوق میں دھواں بھی نگلنا پڑا مجھے

  "ریاض ساغر"

نظر علی

 یوم پیدائش 30 اپریل 1962

جدھر دیکھو ادھر دہشت کھڑی ہے

 خدارا خير ہو مشکل بڑی ہے

 

خموشی اس قدر چھائی ہے ہر سو

نگر کی ہر گلی سونی پڑی ہے

پرندے ناتواں ہیں آشیاں میں

نگاه باز ہر جاں پر گڑی ہے 

 جہاں پر بھائی چارے کی ضیا تھی

 وہاں اب تیرگی پھیلی پڑی ہے

 

محبت آئے تو آئے کدھر سے

عداوت راستہ روکے کھڑی ہے

بنایا کارواں کا جن کو رہبر

شرارت ان کے تاجوں میں جڑی ہے

حکومت ہے جہاں میں نفرتوں کی

نظر یہ بھی سیاست کی کڑی ہے

نظرعلی

نیاز سواتی

 یوم پیدائش 29 اپریل 1941

حسینوں سے تمہاری دوستی اچھی نہیں لگتی

بڑھاپے میں یہ عشق و عاشقی اچھی نہیں لگتی

مزا کچھ اور ہی تھا پی ڈبلیو ڈی کی سروس کا

ہمیں اب اور کوئی نوکری اچھی نہیں لگتی

الیکشن میں تو ہر ووٹر پر اپنی جاں چھڑکتے تھے

اب ان سے رہنماؤ بے رخی اچھی نہیں لگتی

کھلائے جو بھی حلوا تم اسی کا ساتھ دیتے ہو

ہمیں واعظ تمہاری پالیسی اچھی نہیں لگتی

رگڑنا پڑ رہا ہے سر ہر اک ووٹر کے پاؤں پر

اسی باعث تو ہم کو ممبری اچھی نہیں لگتی

نیاز سواتی

عظیم امروہوی

 یوم پیدائش 29 اپریل 1954

انبیاء جتنے ہیں ان کا مرتبہ کچھ اور ہے

عظمتِ حضرت محمد مصطفےؐ کچھ اور ہے

نیل کے پانی میں جو رستہ بنا کچھ اور ہے 

آسمانوں سے جو گزرا راستہ کچھ اور ہے 

چاند ہے سورج ہے تارا ہے نہ ہے کوئی چراغ

آمنہ کے گھر میں یہ جلوہ نما کچھ اور ہے 

ہوگی جنت بھی تری معبود کافی پُر فضا

میری نظروں میں مدینے کی فضا کچھ اور ہے

تھا خدا مطلوب موسیٰؐ کو تو پہنچے طور پر

جس کو بلوایا وہ محبوب خدا کچھ اور ہے

کوئی گزرے گا فلک سے چاند بھی آج خوش

اور تاروں کے چمکنے کی ادا کچھ اور ہے

ہیں محمدؐ تو مدینہ علم کا حیدر ؓ ہیں در

ماسوا حیدر ؓ کہیں سے راستہ کچھ اور ہے

شاعری کا لطف ہر صنف سخن میں ہے عظیم

نعت کہنے کا حقیقت میں مزا کچھ اور ہے 

عظیم امروہوی

مبارک عظیم آبادی

 یوم پیدائش 29 اپریل 1829

درد دل یار رہا درد سے یاری نہ گئی

زندگی ہم سے تو بے لطف گزاری نہ گئی

دن کے نالے نہ گئے رات کی زاری نہ گئی

نہ گئی دل سے کبھی یاد تمہاری نہ گئی

ہم تو خوں گشتہ تمناؤں کے ماتم میں رہے

سینہ کوبی نہ گئی سینہ فگاری نہ گئی

انتظار آپ کا کب لطف سے خالی نکلا

رائیگاں رات کسی روز ہماری نہ گئی

بخشوایا مجھے تم نے تو خدا نے بخشا

نہ گئی روز جزا بات تمہاری نہ گئی

لوگ کہتے ہیں بدلتا ہے زمانہ لیکن

دن ہمارا نہ گیا رات ہماری نہ گئی

مبارک عظیم آبادی

اجے سحاب

 یوم پیدائش 29 اپریل 1969

جب بھی ملتے ہیں تو جینے کی دعا دیتے ہیں

جانے کس بات کی وہ ہم کو سزا دیتے ہیں

حادثے جان تو لیتے ہیں مگر سچ یہ ہے

حادثے ہی ہمیں جینا بھی سکھا دیتے ہیں

رات آئی تو تڑپتے ہیں چراغوں کے لیے

صبح ہوتے ہی جنہیں لوگ بجھا دیتے ہیں

ہوش میں ہو کے بھی ساقی کا بھرم رکھنے کو

لڑکھڑانے کی ہم افواہ اڑا دیتے ہیں

کیوں نہ لوٹے وہ اداسی کا مسافر یارو

زخم سینہ کے اسے روز سدا دیتے ہیں

اجے سحاب

راز علیمی

اک تماشا بنا کے لاتے ہیں

خط ہمارا جلا کے لاتے ہیں

جب جوانی کی یاد آتی ہے

مَے کدے سے اُٹھا کے لاتے ہیں

روٹھ کر جا رہی ہے جانِ بہار

باغباں! چل منا کے لاتے ہیں

میں تقاضائِے دِید کرتا ہوں

عُذر وہ رنگِ ،، نَا ،، کے لاتے ہیں

دل تو بَیعُ و شِرا کی چیز نہیں

اس لیے ہم چُرا کے لاتے ہیں

جب گلابوں کی بات ہوتی ہے

اس کی صورت بنا کے لاتے ہیں

میں سویرے وفا کے لاتا ہوں

وہ اندھیرے دغا کے لاتے ہیں

اس کے بِن بزم سونی سونی ہے

چل ذرا ورغلا کے لاتے ہیں

قریۂِ دل سے راز اُمیدوں کی

ساری شمعیں بجھا کے لاتے ہیں

راز علیمیؔ

محمد وقار احمد نوری

 سرفروشی چاہنا ہے لازمی

وقت آیا جاگنا ہے لازمی

ہندو مسلم سکھ عسائی ایک ہوں

بند آنکھیں کھولنا ہے لازمی

قصر باطل کے ہلانے کے لیے

قلبِ مومن کی صدا ہے لازمی

صحبت صالح کرو تم اختیار

نیک بننا اب ذرا ہے لازمی

زندگی رنگیں بنانے کے لیے

الفتوں سے رابطہ ہے لازمی

ہے اگر رہنا محبت سے سدا

نفرتوں کا خاتمہ ہے لازمی

مختصر ہے زندگی اے دوستو

چار دن میں لوٹنا ہے لازمی

پوچھتے ہو کیا ہمیں تم ظالمو

دل میں خود کے جھانکنا ہے لازمی

آنچ ایماں پر اگر آئے کبھی

سر کٹانا کاٹنا ہے لازمی

قل ھواللہ احد کی اے وقار

رزمِ باطل میں نوا ہے لازمی

محمد وقار احمد نوری