وفا صمدانی

 یوم پیدائش 11 نومبر

محبت کا کرشمہ یہ ہوا ہے

کہ اس کا نام لب پر آگیا ہے

خدا جانے کہاں منزل ہے میری

نگاہوں کا یہ رستہ بھا گیا ہے

بھلا سکتی نہیں اس کو وفا میں

وہ میرے ذہن و دل پر چھا گیا ہے

وفا صمدانی

ورید اللہ ورید

 یوم پیدائش 11 نومبر

آدم کے ساتھ دیس نکالا دیا مجھے

قدرت نے دیکھنے کو تماشا دیا مجھے

اتنا ہنسا کہ آنکھ بھی پانی سے بھر گئی

اک شخص نے مذاق میں الجھا دیا مجھے

خود کو قصوروار سمجھنے لگا تھا میں

اس نے کچھ اس حساب سے دھوکا دیا مجھے

حاکم نے شاہ زادی سے الفت کے جرم میں

اک خواب کی فصیل میں چنوا دیا مجھے

آنکھیں کھلیں ورید تغافل کی بھیڑ میں

گل نے جہانِ خواب سے چونکا دیا مجھے

ورید اللہ ورید

مشتاق صدف

 یوم پیدائش 11 نومبر 1969

آئنہ ایسا کبھی دیکھا نہ تھا

میرے چہرے میں مرا چہرہ نہ تھا

نیند لپٹی رہ گئی اس خواب سے

در حقیقت خواب جو اپنا نہ تھا

اک پڑوسی دوسرے سے نابلد

بے مروت شہر تو اتنا نہ تھا

روشنی کا یہ بھی ہے اک تجربہ

میں جہاں بھٹکا تھا اندھیارا نہ تھا

ہاتھ جو کھولا تو بچہ رو پڑا

بند مٹھی میں کوئی سکہ نہ تھا

مشتاق صدف

بخش لائلپوری

 یوم پیدائش 11 نومبر 1934

کبھی آنکھوں پہ کبھی سر پہ بٹھائے رکھنا

زندگی تلخ سہی دل سے لگائے رکھنا

لفظ تو لفظ ہیں کاغذ سے بھی خوشبو پھوٹے

صفحۂ وقت پہ وہ پھول کھلائے رکھنا

چاند کیا چیز ہے سورج بھی ابھر آئے گا

ظلمت شب میں لہو دل کا جلائے رکھنا

حرمت حرف پہ الزام نہ آنے پائے

سخن حق کو سر دار سجائے رکھنا

فرش تو فرش فلک پر بھی سنائی دے گا

میری آواز میں آواز ملائے رکھنا

کبھی وہ یاد بھی آئے تو ملامت کرنا

کبھی اس شوخ کی تصویر بنائے رکھنا

بخشؔ سیکھا ہے شہیدان وفا سے ہم نے

ہاتھ کٹ جائیں علم منہ سے اٹھائے رکھنا

بخش لائلپوری

فارغ بخاری

 یوم پیدائش 11 نومبر 1917

یاد آئیں گے زمانے کو مثالوں کے لیے

جیسے بوسیدہ کتابیں ہوں حوالوں کے لیے

دیکھ یوں وقت کی دہلیز سے ٹکرا کے نہ گر

راستے بند نہیں سوچنے والوں کے لیے

آؤ تعمیر کریں اپنی وفا کا معبد

ہم نہ مسجد کے لیے ہیں نہ شوالوں کے لیے

سالہا سال عقیدت سے کھلا رہتا ہے

منفرد راہوں کا آغوش جیالوں کے لیے

رات کا کرب ہے گلبانگ سحر کا خالق

پیار کا گیت ہے یہ درد اجالوں کے لیے

شب فرقت میں سلگتی ہوئی یادوں کے سوا

اور کیا رکھا ہے ہم چاہنے والوں کے لیے

فارغ بخاری

مولانا ابوالکلام آزاد

 یوم پیدائش 11 نومبر 1888

ہے عکس روئے یار دل داغ دار میں

کچھ تیرگی نہیں ہے ہمارے مزار میں

کچھ ایسے محو ہو گئے اقرار یار میں

لطف انتظار کا نہ ملا انتظار میں

دوچند اس سے حسن پہ ان کو غرور ہے

جتنا نیاز و عجز ہے مجھ خاکسار میں

وہ پیاری پیاری شکل وہ انداز دل فریب

رہتا نہیں ہے دیکھ کے دل اختیار میں

ایسی بھری ہیں یار کے دل میں کدورتیں

نامہ لکھا ہے مجھ کو تو خط غبار میں

ہم کچھ وصف کاکل پیچاں نہ لکھ سکے

مضموں الجھ رہے ہیں قلم مشکبار میں

کچھ بھی نہ اس کی وعدہ خلافی کا رنج ہو

آ جائے موت ہی جو شب انتظار میں

اے موت تو ہی آ نہ آئیں گے وہ کبھی

آنکھیں ہیں اک عرصے سے وا انتظار میں

سمجھو کہ کس کو کہتے ہیں تکلیف انتظار

بیٹھو کبھی جو دیدۂ خوننابہ یار میں

سودائے زلف و رخ میں غضب کا ہے انتظار

اب آ گئے ہیں گردش لیل و نہار میں

بیٹھے ہیں آج آپ تو پہلو میں غیر کے

ہم ہوں گے کل عروس اجل کے کنار میں

مٹ کر ہوں خاک سرمہ کی مانند بھی اگر

پھر بھی کبھی سمائیں نہ ہم چشم یار میں

کہنے لگے کہ آپ کی نیت تو ٹھیک ہے

بیتاب مجھ کو دیکھ کے بوس و کنار میں

شکوہ کریں تو کیا کریں جور و جفا کا ہم

سب عمر کٹ گئی ستم روزگار میں

مرنے کے بعد بھی ہے وہی کشمکش خدا

میں قبر میں ہوں دل مرا ہے کوئے یار میں

تقدیر کے لکھے کو مٹانا محال ہے

کیا دخل ہے مشیت پروردگار میں

بجلی سی کوند جاتی ہے گھونگھٹ کی آڑ میں

کیا شوخیاں ہیں اس نگہ شرمسار میں

دعوائے عاشقی پہ یہ کہنے لگا وہ بت

اللہ کی شان !آپ بھی ہیں اس شمار میں

پامال کیجئے گا سمجھ کر خدا اسے

ہے آپ ہی کا گھر دل بے اختیار میں

سودا نیا ، جنوں ہے نیا ، ولولے نئے

اب اور ہی بہار ہے اب کے بہار میں

دل پر لگی وہ چوٹ کہ اف کر کے رہ گئے

ٹوٹا جو گرکے جام کوئی بزم یار میں

گر ان پہ اختیار نہیں ہے نہیں سہی

غم ہے یہی کہ دل بھی نہیں اختیار میں

اے دل خدا کی یاد میں

اب صرف عمر ہو

کچھ کم پھرے صنم کدۂ روزگار میں 

مولانا ابوالکلام آزاد

باسط علی صبا

 یوم پیدائش 11 نومبر 1935

ملبوس جب ہوا نے بدن سے چرا لیے

دوشیزگان صبح نے چہرے چھپا لیے

ہم نے تو اپنے جسم پہ زخموں کے آئینے

ہر حادثے کی یاد سمجھ کے سجا لیے

میزان عدل تیرا جھکاؤ ہے جس طرف

اس سمت سے دلوں نے بڑے زخم کھا لیے

دیوار کیا گری مرے خستہ مکان کی

لوگوں نے میرے صحن میں رستے بنا لیے

لوگوں کی چادروں پہ بناتی رہی وہ پھول

پیوند اس نے اپنی قبا میں سجا لیے

ہر مرحلہ کے دوش پہ ترکش کو دیکھ کر

ماؤں نے اپنی گود میں بچے چھپا لیے

سبط علی صبا 

احمد علی برقی اعظمی

 بیاد مولانا ابوالکلام آزاد

تاریخ ولادت 11 نومبر 1888

تاریخ وفات : 22 فروری 1958

شخصیت آزاد کی تھی مرجع اہل نظر

ان کو حاصل تھا جہاں میں عز و جاہ و کر وفر

ہے " غبار خاطر " ان کے فکر و فن کی ترجمان

ان کے رشحات قلم ہیں مظہر علم و ہنر

ان کی عظمت کے نشاں ہیں " الہلال " و " البلاغ "

جس میں ہیں اردو صحافت کے سبھی لعل و گہر

"ترجمان القرآں " ہے ان کی بصیرت کی گواہ

ان کی اردو فارسی عربی پہ تھی گہری نظر

شخصیت پر ان کی ہے اقبال کا صادق یہ قول

ہوتے ہیں پیدا بڑی مشکل سے ایسے دیدہ ور

ان کی تقریروں سے عصری آگہی ہے ہمکنار

ان کی تحریریں ہیں اک آٸینہ نقد و نظر

اس صدی کی تھے وہ برقی شخصیت تاریخ ساز

ان کا فن آٸینہ ایام میں ہے جلوہ گر

احمد علی برقی اعظمی

غضنفر غضنی

 دونوں ہی آج رنج و الم سے نکل گ

ئے

دونوں کے زخم بھرگئے دونوں سنبھل گئے

ہوتا تھا خوش میں جن کی ترقی پہ دوستو

وہ لوگ آج میری ترقی سے جل گئے

اک روز تھے عروج پہ جو چاند کی طرح

سورج کی طرح آج وہی لوگ ڈھل گئے

مانا کہ کل تلک وہ مرے دل میں تھے مگر

یہ سچ ہے آج وہ مرے دل سے نکل گئے

کل تک جو میرے ساتھ تھے غضنی وہ اب نہیں

بدلا جو وقت میرا تو سارے بدل گئے

غضنفر غضنی

سرفراز نواز

 یوم پیدائش 10 نومبر 1977

ایک رستے کی کہانی جو سنی پانی سے 

ہم بھی اس بار نہیں بھاگے پریشانی سے 

میری بے جان سی آنکھوں سے ڈھلکتے آنسو 

آئینہ دیکھ رہا ہے بڑی حیرانی سے 

میرے اندر تھے ہزاروں ہی اکیلے مجھ سے 

میں نے اک بھیڑ نکالی اسی ویرانی سے 

مات کھائے ہوئے تم بیٹھے ہو دانائی سے 

جیت ہم لے کے چلے آئے ہیں نادانی سے 

ورنہ مٹی کے گھڑے جیسے بدن ہیں سارے 

معرکے سر ہوئے سب جرأت ایمانی سے 

آئینہ چپکے سے منظر وہ چرا لیتا ہے 

تو سجاتا ہے بدن جب کبھی عریانی سے

سرفراز نواز