آتش رضا شیخ پوری

یوم پیدائش 04 جنوری 1962

آئنہ ہی بس ہمارا ایک سچا دوست ہے

ہم اگر روتے بھی ہیں تو وہ کبھی ہنستا نہیں

آتش رضا شیخ پوری

آشو مشرا

یوم پیدائش 04 جنوری 1993

دل کو اب ہجر کے لمحات میں ڈر لگتا ہے 

گھر اکیلا ہو تو پھر رات میں ڈر لگتا ہے 

ایک تصویر سے رہتا ہوں مخاطب گھنٹوں 

جب بھی تنہائی کے حالات میں ڈر لگتا ہے 

میری آنکھوں سے مرے جھوٹ عیاں ہوتے ہیں 

اس لیے تجھ سے ملاقات میں ڈر لگتا ہے 

لمحۂ قرب میں لگتا ہے بچھڑ جائیں گے 

ہاتھ جب بھی ہو ترے ہاتھ میں ڈر لگتا ہے 

آج کل میں انہیں جلدی ہی بدل دیتا ہوں 

آج کل دل کے مکانات میں ڈر لگتا ہے 

جسم کی آگ کو بارش سے ہوا ملتی ہے 

ساتھ میں تو ہو تو برسات میں ڈر لگتا ہے 

آشو مشرا

فہمی بدایونی

یوم پیدائش 04 جنوری 1952

پوچھ لیتے وہ بس مزاج مرا 

کتنا آسان تھا علاج مرا 

چارہ گر کی نظر بتاتی ہے 

حال اچھا نہیں ہے آج مرا 

میں تو رہتا ہوں دشت میں مصروف 

قیس کرتا ہے کام کاج مرا 

کوئی کاسہ مدد کو بھیج اللہ 

میرے بس میں نہیں ہے تاج مرا 

میں محبت کی بادشاہت ہوں 

مجھ پہ چلتا نہیں ہے راج مرا

فہمی بدایونی

انور جمال انور

یوم پیدائش 04 جنوری 1944

بے گھر تھا پھر چھوڑ گیا گھر جانے کیوں

پار کیا ہے سات سمندر جانے کیوں

آنکھیں حیراں دل ویراں ہیں چہرے زرد

چیخ رہا ہے منظر منظر جانے کیوں

آنکھوں میں مظلوموں کے بس آنسو ہیں

فکر میں ہے ہر ایک ستم گر جانے کیوں

تپتی ریت جھلستے سائے تند ہوا

گھر سے نکلا موم کا پیکر جانے کیوں

پھول سا چہرہ جھیل سی اس کی آنکھیں ہیں

یاد آتا ہے مجھ کو اکثر جانے کیوں

آتے جاتے سب سے باتیں کرتا تھا

چپ بیٹھا ہے آج قلندر جانے کیوں

میری غزلیں سن کر انورؔ چاہت سے

دیکھتا ہے ہر ایک سخنور جانے کیوں

انور جمال انور

ریاض ساغر

یوم پیدائش 03 جنوری 1959

موسم گل میں بھی ہر سمت خزاں چھائی ہے

کیسے کہدوں کہ گلستاں میں بہار آئی ہے

باغباں نوچ رہا ہے یہاں کلیوں کے بدن

پھول ہیں سہمے ہوئے ہر کلی مرجھائی ہے

ظلم اور جبر کے ایوان لرز اٹھے ہیں

آہ مظلوم کی جب عرش سے ٹکرائی ہے

مار ڈالے نہ کہیں تلخ نوائی ہم کو،

ہم‌ نے سچ بولتے رہنے کی قسم کھائی ہے

جس کو پالا تھا بڑے ناز سے وہ چھوڑ گیا

باپ نے کیسی بڑھاپے میں سزا پائی ہے

تانے اور بانے میں الجھے رہے تاعمر مگر

گتھی حالات کی ہم سے نہ سلجھ پائی ہے

صرف احساس ندامت تھا مری آنکھوں میں

رحمت حق مرے آنگن میں اتر آئی ہے

ریاض ساغر

جیا قریشی

یوم پیدائش 03 جنوری 1965

نسخہِ درد کی تالیف نہیں ہوسکتی

ہائے اس باب میں تخفیف نہیں ہوسکتی

عدل و انصاف مرا دِیں ہے ،لہٰذا مجھ سے

منظرِ ظلم کی تعریف نہیں ہوسکتی

نفرتوں میں کبھی ترمیم تو ہوسکتی ہے

الفتوں میں کبھی تحریف نہیں ہوسکتی

رہنے دیجیے یہ وفا ، آپ کو معلوم تو ہے

اس قدر آپ سے تکلیف نہیں ہوسکتی

کیوں بھلا آپ جُنوں وقفِ قلم کرتے ہیں؟

یہ کتاب آپ سے تصنیف نہیں ہوسکتی

ہائے وہ لفظ خزانے جو لٹائے تم پر

اب کسی اور کی توصیف نہیں ہو سکتی

جیا قریشی

آدرش دوبے

یوم پیدائش 03 جنوری 2001

سونا پڑا ہے دل کا مکاں آپ کے بنا 

رہ رہ کے اٹھ رہا ہے دھواں آپ کے بنا 

یوں تو کھلے ہیں پھول کئی رنگ کے مگر 

پھیکے پڑے ہیں دونوں جہاں آپ کے بنا 

یہ سوچ کے میں گھوم رہا ہوں یہاں وہاں 

راحت ملے گی دل کو کہاں آپ کے بنا 

بس اس لیے ہی گاؤں سے میں شہر آ بسا 

میں کیا کروں گا رہ کے وہاں آپ کے بنا 

آدرشؔ کہہ رہا ہے کہ مت آؤ میرے پاس 

برباد ہو گیا ہوں یہاں آپ کے بنا 

آدرش دوبے

بسمل عارفی

یوم پیدائش 03 جنوری 1970

خیال و خواب کی دنیا سے استفادہ کیا 

ہنر سمجھ کے اسی کام کو زیادہ کیا 

یہ تو نے کون سے منصب کی پاسداری کی 

بنایا میر مجھے خود کو میر زادہ کیا 

کمال یہ کہ جسے راستہ ملا ہی نہیں 

وہ کہہ رہا ہے سفر ہم نے پا پیادہ کیا 

کوئی بتاؤ کہ میں خود کو روکتا کیسے 

جب اس نے ساتھ مرے چلنے کا ارادہ کیا 

بہت دنوں پہ طبیعت ادھر ہوئی مائل 

بہت دنوں پہ صبا نے بھی دل کشادہ کیا

بسمل عارفی

ظہیر احمد پرواز

یوم پیدائش 03 جنوری 1946

آگیا اس کی اداؤں میں یہ کیسا انقلاب

کل تلک معصوم جو تھا آج قاتل ہوگیا

ظہیر احمد پرواز 

عبد الجمید فیضی

یوم پیدائش 03 جنوری 1940

دردِ دل کی داستاں سنتا ہے کون

اور سُن بھی لے تو سر دھنتا ہے کون

رنج و غم کے تپتے ریگستان میں

پاپیادہ دھوپ میں تپتا ہے کون

خود کو گاندھی وادی کہلاتے ہیں سب

اپنے کپڑے آپ ہی بنتا ہے کون

فیضیؔ سچ کہہ کرکبھی مت سوچیے

کون سنتا ہے‘ نہیں سنتا ہے کون

عبد الجمید فیضی