مہ جبین عثمان

یوم پیدائش 16 اکتوبر 

تجدید التفات گوارہ نہیں ہمیں 

پھر سے تعلقات گوارہ نہیں ہمیں

منظور یہ نہیں کوئی دہرائے پھر انہیں

تشہیرِ حادثات گوارہ نہیں ہمیں

طے کر چکے ہیں زیست کا ہر ایک امتحاں

پھر سےشمارِ ذات گوارا نہیں ہمیں

ہے دل کا کام صرف دھڑکنا سو وہ کرے 

اس کے مطالبات گوارا نہیں ہمیں

محتاج، حسنِ دلربا سنگھار کا نہیں

اس پر لوازمات گوارہ نہیں ہمیں

جو اجتناب کرنے لگے ہیں جبین سے

ان سے گزارشات گوارہ نہیں ہمیں

مہ جبین عثمان

کرامت بخاری

یوم پیدائش 16 اکتوبر 1958

جس شجر پر ثمر نہیں ہوتا 

اس کو پتھر کا ڈر نہیں ہوتا 

آنکھ میں بھی چمک نہیں ہوتی 

جب وہ پیش نظر نہیں ہوتا

مے کدے میں یہ ایک خوبی ہے 

ناصحا تیرا ڈر نہیں ہوتا 

اب تو بازار بھی ہیں بے رونق 

کوئی یوسف ادھر نہیں ہوتا 

جو صدف ساحلوں پہ رہ جائے 

اس میں کوئی گہر نہیں ہوتا 

آہ تو اب بھی دل سے اٹھتی ہے 

لیکن اس میں اثر نہیں ہوتا 

غم کے ماروں کا جو بھی مسکن ہو 

گھر تو ہوتا ہے پر نہیں ہوتا 

اہل دل جو بھی کام کرتے ہیں 

اس میں شیطاں کا شر نہیں ہوتا

کرامت بخاری

ادیب راے پوری

یوم وفات 16 اکتوبر 2004

خدا کا ذکر کرے ذکرِ مصطفیٰ نہ کرے 

ہمارے منہ میں ہو ایسی زباں خدا نہ کرے 

درِ رسول پہ ایسا کبھی نہیں دیکھا 

کوئی سوال کرے اور وہ عطا نہ کرے 

کہا خدا نے شفاعت کی بات محشر میں 

مرا حبیب کرے کوئی دوسرا نہ کرے 

مدینے جا کے نکلنا نہ شہر سے باہر 

خدانخواستہ یہ زندگی وفا نہ کرے 

اسیر جس کو بنا کر رکھیں مدینے میں 

تمام عمر رہائی کی وہ دعا نہ کرے

شعورِ نعت بھی ہو اور زبان بھی ہو ادیبؔ 

وہ آدمی نہیں جو ان کا حق ادا نہ کرے

ادیب راے پوری

حمید نسیم

یوم پیدائش 16 اکتوبر 1920

محبت جادہ ہے منزل نہیں ہے 

یہ مشکل آخری مشکل نہیں ہے 

دل رہرو میں ہیں کچھ اور خطرے 

خیال دوریٔ منزل نہیں ہے 

خرد باطل خرد پر ناز باطل 

مگر یہ تو جنوں باطل نہیں ہے 

یہ دل بے مہر بھی ہے بے وفا بھی 

نہیں یہ دل تو میرا دل نہیں ہے 

ڈراتا ہے مجھے یوں خندۂ برق 

مجھے اندیشۂ حاصل نہیں ہے 

میں سب کچھ جانتا ہوں اپنا انجام 

مگر اظہار کے قابل نہیں ہے 

میان قعر دریا ہے سفینہ 

نہیں اے ناخدا ساحل نہیں ہے 

یہاں مہر و وفا نادانیاں ہیں 

یہ دنیا عشق کے قابل نہیں ہے 

یہ ہے مرحوم امیدوں کا مدفن 

کبھی دل تھا مگر اب دل نہیں ہے 

حمید نسیم

معصومہ بیگم معصومہ

یوم پیدائش 15 اکتوبر 1934

مرثیہ

شہہ کہتے تھے عباس علم دار کہاں ہو

آواز دو مجھ کو مرے جرار کہاں ہو

للہ صدا دو کہ نہیں ضبط کا یارا

اے قوتِ بازو مرے غم خوار کہاں ہو

تم شیر سے دریا کی ترائی میں ہو سوتے

ہم ڈھونڈتے ہیں بھائی وفادار کہاں ہو

زینب نے کہا آئی نہ کیوں رن سے سواری

خالی علم آیا ہے ، علم دار کہاں ہو

معصومہ عجب یاس سے کہتے تھے شہہِ دیں

اے جانِ برادر مرے دل دار کہاں ہو

معصومہ بیگم معصومہ

 

ہلال جعفری

یوم وفات 15 اکتوبر 1956

دلِ مضطر کا ہے اصرار بڑی مشکل ہے

کیسے ہو درد کا اظہار بڑی مشکل ہے

لاج رکھ لیجئے سرکار بڑی مشکل ہے

ہے بپا حشر کا بازار بڑی مشکل ہے

کوئی محسن ہے نہ غم خوار بڑی مشکل ہے

ایک سے ایک ہے بیزار بڑی مشکل ہے

کیسے پہنچوں گا میں اُس پار بڑی مشکل ہے

موجِ ساحل بھی ہے منجدھار بڑی مشکل ہے

دامنِ عفو ہے درکار بڑی مشکل ہے

اشک بہتے ہیں لگاتار بڑی مشکل ہے

یہ الگ بات اطبا بھی نہ پہچان سکے

میں مدینے کا ہوں بیمار بڑی مشکل ہے

سلکِ گوہر نہیں بنتا ہے یہ موتی آقا

چشمِ گریاں کا ہر اِک تار بڑی مشکل ہے

میری کشتی کا ہلاؔل آج نگہباں ہے خدا

بادباں کوئی نہ پتوار بڑی مشکل ہے

ہلال جعفری

احقر لکھنوی

یوم پیدائش 15 اکتوبر 1906

رباعی

احباب سے امیدِ رفاقت کیسی

عشرت میں یہ دیں فریبِ عسرت کیسی

کیا کاغذی پھولوں میں ہو خوشبو کا سوال

برفاب میں گرمی و حرارت کیسی

احقر لکھنوی

میر احمد نوید

یوم پیدائش 14 اکتوبر 1958

چراغ ہائے تکلف بجھا دیے گئے ہیں 

اٹھاؤ جام کہ پردے اٹھا دیے گئے ہیں 

اب اس کو دید کہیں یا اسے کہیں دیدار 

ہمارے آگے سے جو ہم ہٹا دیے گئے ہیں 

اب اس مقام پہ ہے یہ جنوں کہ ہوش نہیں 

مٹا دیے گئے ہیں یا بنا دیے گئے ہیں 

یہ راز مرنے سے پہلے تو کھل نہیں سکتا 

سلا دیے گئے ہیں یا جگا دیے گئے ہیں 

جو مل گئے تو تونگر نہ مل سکے تو گدا 

ہم اپنی ذات کے اندر چھپا دیے گئے ہیں 

چراغ بزم ہیں ہم راز دار صحبت بزم 

بجھا دیے گئے ہیں یا جلا دیے گئے ہیں

میر احمد نوید

شاہد جمیل شاکری

یوم پیدائش 13 اکتوبر 1939

چلنا اپنا جانبِ منزل کل بھی تھا اور آج بھی ہے

جہدِ عمل ہی زیست کا حاصل کل بھی تھا اور آج بھی ہے

شاہد جمیل شاکری

 

 

عرفان سلیمی

یوم پیدائش 13 اکتوبر 1992

کسی کی یاد سے تپنے لگی سفر کی سڑک

سو گریہ کرتے ہوئے دیکھ، میں نے تر کی سڑک

ٹہل کے اِس پہ تھکن، یاد، غم سے ملتا ہوں

فنا ہو جاتی ہے دن میں یہ رات بھر کی سڑک

میں دل میں سوچوں جو، اس کو سنائی دیتا ہے

براہِ راست اُدھر جاتی ہے اِدھر کی سڑک

شدید پیاس تھی اک جھیل کا پتا تھا مجھے

گئی نہیں مگر اُس سمت، تیرے در کی سڑک

چلوں تو دفن ہوئے لوگ یاد آ تے ہیں

مرے عزیزوں پہ گزری ہے مٹی پر کی سڑک

بہت درخت ہوں، سب پر خزاں بحال رہے

گرے ہوں ہر کہیں پتے، ملے نہ گھر کی سڑک

عرفان سلیمی