عارف اعظمی

 پیدائش:01 جنوری 1951

چمن والو حقیقت ہم سے بتلائی نہیں جاتی 

گلوں کے دل پہ جو بیتی وہ سمجھائی نہیں جاتی

 

چمن کا حسن بالآخر گلوں کی آبرو ٹھہرا 

یہ عزت شاہ راہ عام پہ لائی نہیں جاتی

 

غم دوراں کی الجھن ہو کہ وحشت ہو محبت کی 

شکستہ دل کی حالت بر زباں لائی نہیں جاتی

 

ارے کم ظرف مے نوشی کا یہ کوئی سلیقہ ہے 

سر محفل مئے گل رنگ چھلکائی نہیں جاتی

 

سجا دیتا ہوں خوابوں کے در و دیوار پہ اس کو 

وہ اک شے جو کسی صورت سے اپنائی نہیں جاتی

 

نہ پوچھو کیا نگاہ ناز نے دل پر اثر چھوڑا 

غزل کے شعر میں تاثیر وہ لائی نہیں جاتی

 

ہجوم شہر ہو عارفؔ کہ اپنے گھر کی خلوت ہو 

نہیں جاتی مگر اپنی یہ تنہائی نہیں جاتی 

عارف اعظمی