اس طرح دل میں کوئی جلوہ نشیں ہوتا ہے
جیسے آئینے میں اک عکسِ حسیں ہوتا ہے
ہم کو انجامِ محبت سے ڈرانے والو !
فکرِ انجام محبت میں کہیں ہوتا ہے ؟
اب ترے عشق میں حالت ہے یہ میرے دل کی
تیری قربت کا بھی احساس نہیں ہوتا ہے
رفعتِ بامِ ثریا پہ پہچنے والو !!
آخرش ! آدمی پیوندِ زمیں ہوتا ہے !
عمر کے ساتھ نہیں عشق و محبت مشروط
عشق جس عمر میں ہوتا ہے حسیں ہوتا ہے
عشق اس سجدے کا قائل ہی نہیں ہے شعبان
ایسا سجدہ کہ جو مرہونِ جبیں ہوتا ہے
شعبان بخاری
No comments:
Post a Comment