عزیز وارثی

 یوم پیدائش 17 جولائی 1924

سوزش غم کے سوا کاہش فرقت کے سوا

عشق میں کچھ بھی نہیں درد کی لذت کے سوا

دل میں اب کچھ بھی نہیں ان کی محبت کے سوا

سب فسانے ہیں حقیقت میں حقیقت کے سوا

کون کہہ سکتا ہے یہ اہل طریقت کے سوا

سارے جھگڑے ہیں جہاں میں تری نسبت کے سوا

کتنے چہروں نے مجھے دعوت جلوہ بخشی

کوئی صورت نہ ملی آپ کی صورت کے سوا

غم عقبیٰ غم دوراں غم ہستی کی قسم

اور بھی غم ہیں زمانے میں محبت کے سوا

بزم جاناں میں ارے ذوق فراواں اب تک

کچھ بھی حاصل نہ ہوا دیدۂ حیرت کے سوا

وہ شب ہجر وہ تاریک فضا وہ وحشت

کوئی غمخوار نہ تھا درد کی شدت کے سوا

محتسب آؤ چلیں آج تو مے خانے میں

ایک جنت ہے وہاں آپ کی جنت کے سوا

جو تہی دست بھی ہے اور تہی دامن بھی

وہ کہاں جائے گا تیرے در دولت کے سوا

جس نے قدرت کے ہر اقدام سے ٹکر لی ہے

وہ پشیماں نہ ہوا جبر مشیت کے سوا

مجھ سے یہ پوچھ رہے ہیں مرے احباب عزیزؔ

کیا ملا شہر سخن میں تمہیں شہرت کے سوا

عزیز وارثی

طفیل ہوشیارپوری

 یوم پیدائش 17 جولائی 1914

انجُمن انجُمن شِناسائی

دِل کا پھر بھی نصیب تنہائی

خُشک آنکھوں سے عمر بھرروئے

ہو نہ جائے کِسی کی رُسوائی

جب کبھی تُم کو بُھولنا چاہا

انتقاماً تمہاری یاد آئی

جب کِسی نے مزاجِ غم پُوچھا

دل تڑپ اُٹّھا، آنکھ بھر آئی

جذبۂ دل کا اب خُدا حافِظ

حُسن مُحتاج، عِشق سودائی

طفیل ہوشیارپوری​

بسمل صابری

 یوم پیدائش 17 جولائی

وہ عکس بن کے مری چشم تر میں رہتا ہے

عجیب شخص ہے پانی کے گھر میں رہتا ہے

وہی ستارہ شب غم کا اک ستارہ ہے

وہ اک ستارہ جو چشم سحر میں رہتا ہے

کھلی فضا کا پیامی ہوا کا باسی ہے

کہاں وہ حلقۂ دیوار و در میں رہتا ہے

جو میرے ہونٹوں پہ آئے تو گنگناؤں اسے

وہ شعر بن کے بیاض نظر میں رہتا ہے

گزرتا وقت مرا غم گسار کیا ہوگا

یہ خود تعاقب شام و سحر میں رہتا ہے

مرا ہی روپ ہے تو غور سے اگر دیکھے

بگولہ سا جو تری رہ گزر میں رہتا ہے

نہ جانے کون ہے جس کی تلاش میں بسملؔ

ہر ایک سانس مرا اب سفر میں رہتا ہے

بسمل صابری

اسلم حبیب

 یوم پیدائش 16 جولائی 1950

زیست کی دھوپ سے یوں بچ کے نکلتا کیوں ہے

تو جو سورج ہے تو پھر سائے میں چلتا کیوں ہے

تو جو پتھر ہے تو پھر پلکوں پہ آنسو کیسے

تو سمندر ہے تو پھر آگ میں جلتا کیوں ہے

میرے چہرے میں جو شائستہ نظر آتا ہے

میری شریانوں میں وہ شخص ابلتا کیوں ہے

کل تمہیں نے اسے یہ پیالہ دیا تھا یارو

معترض کیوں ہو کہ وہ زہر اگلتا کیوں ہے

میری سانسوں میں سسکنے کی صدا آتی ہے

ایک مرگھٹ سا مرے سینے میں جلتا کیوں ہے

جانے کن ذروں سے اس خوں کی شناسائی ہے

پاؤں اس موڑ پہ ہی آ کے پھسلتا کیوں ہے

محفل لغو سے تہذیب نے کیا لینا ہے

ایسے شوریدہ سروں میں تو سنبھلتا کیوں ہے

اسلم حبیب

رانا التمش

 مجھ کو فراقِ یار نے پاگل بنا دیا

یعنی کہ انتظار نے پاگل بنا دیا

شاعر بنے ہوئے ہیں سبھی شہر کے مکین

سب کو تمھارے پیار نے پاگل بنا دیا

مجھ کو براۓ شوق بھی رنگیں اداؤں سے 

جانِ وفا شعار نے پاگل بنا دیا 

غربت نشیبِ بخت کا کانٹا بھی ہے مگر

لوگوں کو روز گار نے پاگل بنا دیا

تم مجھ کو چاہتی ھو یا میرے رقیب کو

مجھ کو اسی بچار نے پاگل بنا دیا

اب ہم کو التمش بہ خلوصِ لحاظِ جان

مرضِ دلِ فگار نے پاگل بنا دیا

رانا التمش

یزدانی جالندھری

 یوم پیدائش 16 جولائی 1915

سورج کے ساتھ ساتھ ابھارے گئے ہیں ہم

تاریکیوں میں پھر بھی اتارے گئے ہیں ہم

راس آ سکی نہ ہم کو ہوا تیرے شہر کی

یوں تو قدم قدم پہ سنوارے گئے ہیں ہم

کچھ قہقہوں کے ابر رواں نے دیا نکھار

کچھ غم کی دھوپ سے بھی نکھارے گئے ہیں ہم

ساحل سے رابطہ ہیں نہیں ٹوٹتا کبھی

کیسے سمندروں میں اتارے گئے ہیں ہم

ٹوٹا نہ راہ شوق میں افسون تیرگی

لے کر جلو میں چاند ستارے گئے ہیں ہم

جانا محال تھا تری محفل کو چھوڑ کر

پا کر تری نظر کے اشارے گئے ہیں ہم

اس تیرہ خاکداں میں کوئی پوچھتا نہیں

کہنے کو آسماں سے اتارے گئے ہیں ہم

سو بار بار غم نے پریشاں کیا ہمیں

سو بار مثل زلف سنوارے گئے ہیں ہم

اس سلسلے میں موت تو بدنام ہے یونہی

اس زندگی کے ہاتھوں ہی مارے گئے ہیں ہم

گرداب غم میں ڈوب کے ابھرے ہیں بارہا

کس نے کہا کنارے کنارے گئے ہیں ہم

یزدانؔئ حزیں ہمیں کچھ بھی خبر نہیں

اس آستاں پہ کس کے سہارے گئے ہیں ہم

یزدانی جالندھری

ظہیر ناصری

 یوم پیدائش 16 جولائی 1947

رکھ دی تھی بایزیدؒ نے بانی سمیٹ کر

حق بول اٹھا تھا "اعظم شانی" سمیٹ کر

امّید اپنی ایک مجاور ہے بے مزار

تھک سی گئی ہے فاتحہ خوانی سمیٹ کر

ہم نےورودِ شعر کی خاطر تمام رات

مانگی زکوٰۃِ فکر، معانی سمیٹ کر

سانسوں کی ڈور ٹوٹی جو کنبے کی فکر میں

وہ جارہا ہے اپنی جوانی سمیٹ کر

شاید کہ اس بہانے تمھیں یاد آئیں گے

پرکھوں کی رکّھو گھر میں نشانی سمیٹ کر

بےحس سماعتیں ہوں تو کیا زیبِ داستاں

بہتر ہے آپ کہئیے کہانی سمیٹ کر

غالبؔ کی عظمتوں کو ہمارا سلام ہے

رکھ دی غزل میں بحرِ معانی سمیٹ کر 

سیکھو ظہیر ضبط کا انداز برف سے

قدرت نے خود دکھا دیا پانی سمیٹ کر

ظہیر ناصر

۔۔۔۔۔ ۔۔۔۔۔۔۔

خزانہ دل میں علم وآگہی کا ہم بھی رکھتے ہیں

مٹانے تشنگی مٹّی کا کوزہ ہم بھی رکھتے ہیں

قلندرہیں ہمیں دربارِشاہی سے ھے کیا مطلب

وہاں تک باریابی کا وثیقہ ہم بھی رکھتے ہیں

چمن میں پھولنے پھلنے کا موقع کیوں نہیں حاصل

سرِشاخِ تمنّاآشیانہ ہم بھی رکھتے ہیں

ابھی طاقِ گماں میں کچھ دھواں باقی ھے ماضی کا

یقیں انگیز بنناہوتو سرمہ ہم بھی رکھتے ہیں

نواحِ شہرِ جاں میں آگ برسانے کی خوُ کب تک

بجھانے آگ نوحی پاک دریا ہم بھی رکھتے ہیں

ترے نقشِ قدم ہیں چاند کے سینے پہ، حیرت کیا

اُسے دونیم کرنے کا اشارا ہم بھی رکھتے ہیں

اگر زنخیر ٹوٹے پاسداری کی ظہیر اک دن

ہُنر حلقوں کو پھر سے جوڑنے کا ہم بھی رکھتے ہیں

ظہیر ناصری

گوہر ملسیانی

 یوم پیدائش 15 جولائی 1934

سیرت وکردار دیتے ہیں شہادت آپ کی

چار سو تاباں جہاں میں ہے صداقت آپ کی

زندگانی کا سلیقہ آپ نے بتلا دیا!

نوعِ انساں پر ہے بے پایاں عنایت آپ کی

آپ کے افکار تو قرآن کی تفسیر ہیں

باعثِ رحمت زمانے میں رسالت آپ کی

ملّتِ بیضا کی عظمت آپ کی تعلیم میں

کامیابی کی دلالت ہے شریعت آپ کی

جھولیاں بھرتے رہے محتاج بھی، مسکین بھی

باخدا اتنی فراواں تھی سخاوت آپ کی

کاروان فکر کا جادہ جہان شوق میں

منزل مقصود کا رستہ ہدایت آپ کی

گوہر ملسیانی

امر روحانی

 کچھ بھی نہ چلی پیش کوئی روپ بدل کے

میں زیر ابد کا ہوں، زبر ہیں وہ ازل کے

تجھ کو نہ ڈبو دے کہیں اے ہجرِ مسلسل

تلخابۂ حسرت مری آنکھوں سے نکل کے

پتھر بھی ہیں، کانٹے بھی ہیں، آسیب ِ سفر بھی

رک جا دلِ نادان ، ذرا چلنا سنبھل کے

بیمارِ بتاں کو ملے جب شرفِ ملاقات

دل دوڑ کے باہر کو ہی آوے ہے مچل کے

ہر روز امرؔ خواب سجاتا ہوں میں دل میں

ہر روز گزر جائیں وہ تعبیر کچل کے

اَمر رُوحانی

سعید شہیدی

 یوم پیدائش 14 جولائی 1914

آج آئے ہیں کل جانا ہے پھر عشق کو رسوا کون کرے

دو روزہ دنیا ہے یہ تو دنیا کی تمنا کون کرے

مجبور نہیں مختار سہی خودداری کو رسوا کون کرے

جب موت ہی مانگے سے نہ ملی جینے کی تمنا کون کرے

اس لذت غم کا کیا کہنا وہ یاد تو آتے رہتے ہیں

غم دینے والے کے صدقے اب غم کا مداوا کون کرے

بر آئے تمنا جب نہ کوئی پھر ایسی تمنا سے حاصل

گو دل کا تقاضہ لاکھ سہی توہین تمنا کون کرے

ہونٹوں پہ ہنسی آنکھوں میں نمی ماتھے پہ شکن بل ابرو میں

اللہ ری طرز پرسش غم اب غم کا شکوہ کون کرے

مخمور فضا مستانہ گھٹا ساغر کی کھنک غنچوں کی چٹک

اب ایسے موسم میں ساقی اندیشۂ فردا کون کرے

کیوں اپنے نشیمن کو خود ہی اب آگ لگا دیں ہم نہ سعیدؔ

بجلی کی شکایت کون کرے آندھی کا شکوہ کون کرے

سعید شہیدی