ملک نوید

 یوم پیدائش 29 سپتمبر

عشق نے جوڑ دئے پہلی ملاقات کے ساتھ

چند مہتاب نما داغ مری ذات کے ساتھ

کون کھیلا تھا سمندر تیرے جذبات کے ساتھ

تو نے پربت بھی بہا ڈالے ہیں ذرات کے ساتھ

آؤ کچھ روز پسینے میں نہائیں ہم لوگ

آؤ سنگھرش کریں گردش حالات کے ساتھ

کچھ نئے دوست بنے راہ وفا میں لیکن

کچھ نئے خرچ جڑے پچھلے حسابات کے ساتھ

میں زمیں زاد فلک بوس اگر ہوں بھی تو ، ہے

میری مٹی کی مہک میرے خیالات کے ساتھ

ہاں وہی لوگ تو ہیں دیش کے سچے ہیرو

کھیلتے رہتے ہیں سرحد پہ جو خطرات کے ساتھ

ملک نوید

محسن بھوپالی

 یوم پیدائش 29 سپتمبر 1932

چاہت میں کیا دنیا داری عشق میں کیسی مجبوری

لوگوں کا کیا سمجھانے دو ان کی اپنی مجبوری

میں نے دل کی بات رکھی اور تو نے دنیا والوں کی

میری عرض بھی مجبوری تھی ان کا حکم بھی مجبوری

روک سکو تو پہلی بارش کی بوندوں کو تم روکو

کچی مٹی تو مہکے گی ہے مٹی کی مجبوری

ذات کدے میں پہروں باتیں اور ملیں تو مہر بلب

جبر وقت نے بخشی ہم کو اب کے کیسی مجبوری

جب تک ہنستا گاتا موسم اپنا ہے سب اپنے ہیں

وقت پڑے تو یاد آ جاتی ہے مصنوعی مجبوری

اک آوارہ بادل سے کیوں میں نے سایہ مانگا تھا

میری بھی یہ نادانی تھی اس کی بھی تھی مجبوری

مدت گزری اک وعدے پر آج بھی قائم ہیں محسنؔ

ہم نے ساری عمر نباہی اپنی پہلی مجبوری

محسنؔ بھوپالی

ساحل اجمیری

 یوم پیدائش 29 سپتمبر 1929

ہم اپنی زندگی سے پیار نہ کرتے تو کیا کرتے

یہ نعمت ملتی ہے اک بار نہ کرتے تو کیا کرتے

محبت کا اگر بیوپار نہ کرتے تو کیا کرتے

ہے دنیا حسن کا بازار نہ کرتے تو کیا کرتے

محبت ایسی مجبوری میں اکثر ہو ہی جاتی ہے

تم اتنے پیارے ہو ہم پیار نہ کرتے تو کیا کرتے

برے لوگوں میں اچھائی کا عنصر بھی تو ہوتا ہے

حفاظت گر گلوں کی خار نہ کرتے تو کیا کرتے

ادھورے کام کرنے سے تو دل بھرتا نہیں پیارے

مکمل دل کے کاروبار نہ کرتے تو کیا کرتے

خدایا آپ کی رحمت کا رکھنا تھا بھرم ہم کو

گناہوں کا اگر انبار نہ کرتے تو کیا کرتے

دکھاوے کی یہ دنیا ہے دکھاوا کرنا پڑتا ہے

حسینان جہاں سنگار نہ کرتے تو کیا کرتے

خفا ہونا تو اک کروٹ بدلنے والی فطرت ہے

تو وہ کروٹ بدل کر پیار نہ کرتے تو کیا کرتے

کدورت دل میں ہو تو پھر محبت ہو نہیں سکتی

صفائی دل کی تھی درکار نہ کرتے تو کیا کرتے

بھروسہ ناؤ پہ رکھتے تو پھر ہم ڈولتے رہتے

رفاقت لہروں سے پتوار نہ کرتے تو کیا کرتے

ہمیں اس زندگی میں کچھ نہ کچھ تو کرنا تھا ساحلؔ

محبت بھی اگر اک بار نہ کرتے تو کیا کرتے

ساحل اجمیری

واحد کشمیری

 نظر ملا نا نظر چرانا کمال فن ہے

نگاہ قاتل ترا نشانہ کمال فن ہے

نزاکتیں ہیں روانیاں ہیں ترے بیاں میں

ہراک سخن کا جدا فسانہ کمال فن ہے

تمھارے آنے سے میرا ماضی و حال یکساں

نہ وہ زمانہ نہ یہ زمانہ کمال فن ہے

لکھی ہے رندوں نے اپنے ہاتھوں فرار اپنی

یوں اپنی مرضی شکست کھانا کمال فن ہے

کمال فن ہے لبوں پہ لفظوں کی بے قراری

حیا کی چوکھٹ پہ سر جھکانا کمال فن ہے

محبتوں میں گھلی ہوئی یہ نوازشیں بھی

ملال نو میں یوں منہ چڑھانا کمال فن ہے

سخاوتوں میں محبتوں میں بڑا سکوں ہے

عداوتوں میں قرار پانا کمال فن ہے

لگی ہے برسوں سے آگ دل میں جھلس رہا ہوں 

بھڑکتے شعلوں کو یوں چھپانا کمال فن ہے

واحدکشمیری

رانا التمش ماشی

 صبح سے شام بات ہوتی ہے 

اس کے پہلو میں رات ہوتی ہے 

یہ محبت وہ نیند ہے جس کو 

آنکھ کھلتے ہی مات ہوتی ہے 

ایسے پڑھتی ہے ذہن وہ جیسے 

ماہر - نفسیات ہوتی ہے 

جینے والا بھی جی نہیں پاتا 

جب کسی کی وفات ہوتی ہے 

تیرا ہونا تو خیر ہونا ہے 

تو نہ ہو کر بھی ساتھ ہوتی ہے

لوٹ لے کھل کے زندگی کے مزے 

چار دن کی حیات ہوتی ہے 

ہم وہ کافر ہیں جن کے جرموں کی

شاعری سے نجات ہوتی ہے 

نوجوانی کی عمر میں ماشی 

عشق پہلی ذکات ہوتی ہے 

رانا التمش ماشی

اقبال خورشید

 سبھی کے دل میں حیرانی رہے گی

محبت اپنی لاثانی رہے گی

محبت ہے تو پھر اظہار کر لو

سنو ورنہ , پشیمانی رہے گی

حقیقت ہے عیاں تُو جستجو کر

کٹھن کے بعد آسانی رہے گی

عبادت میں اگر یہ زیست گزری

سدا چہرے پہ تابانی رہے گی

سمندر بن چکی ہیں اب یہ آنکھیں

تری یادوں کی ظغیانی رہے گی

امیرِ شہر کی خورشید دیکھو

قیامت میں نہ من مانی رہے گی

 اقبال خورشید

انجم رومانی

 یوم پیدائش 28 سپتمبر 1920

کچھ اجنبی سے لوگ تھے کچھ اجنبی سے ہم

دنیا میں ہو نہ پائے شناسا کسی سے ہم

دیتے نہیں سجھائی جو دنیا کے خط و خال

آئے ہیں تیرگی میں مگر روشنی سے ہم

یاں تو ہر اک قدم پہ خلل ہے حواس کا

اے خضر باز آئے تری ہم رہی سے ہم

دیتے ہیں لوگ آج اسے شاعری کا نام

پڑھتے تھے لوح دل پہ کچھ آشفتگی سے ہم

رہتی ہے انجمؔ ایک زمانے سے گفتگو

کرتے نہیں کلام بظاہر کسی سے ہم

انجم رومانی

ظفر اقبال

 یوم پیدائش 27 سپتمبر 1933

خامشی اچھی نہیں انکار ہونا چاہئے

یہ تماشا اب سر بازار ہونا چاہئے

خواب کی تعبیر پر اصرار ہے جن کو ابھی

پہلے ان کو خواب سے بیدار ہونا چاہئے

ڈوب کر مرنا بھی اسلوب محبت ہو تو ہو

وہ جو دریا ہے تو اس کو پار ہونا چاہئے

اب وہی کرنے لگے دیدار سے آگے کی بات

جو کبھی کہتے تھے بس دیدار ہونا چاہئے

بات پوری ہے ادھوری چاہئے اے جان جاں

کام آساں ہے اسے دشوار ہونا چاہئے

دوستی کے نام پر کیجے نہ کیونکر دشمنی

کچھ نہ کچھ آخر طریق کار ہونا چاہئے

جھوٹ بولا ہے تو قائم بھی رہو اس پر ظفرؔ

آدمی کو صاحب کردار ہونا چاہئے

ظفر اقبال

شمشاد شاد

 شوق سے قتل کرو کوکھ میں بیٹی کو مگر

پھر نہ کہنا کہ زمیں پر کوئی عورت نہ رہی

شمشاد شاؔد

اعزاز احمد آذر

 یوم پیدائش 25 سپتمبر 1942

ان اجڑی بستیوں کا کوئی تو نشاں رہے 

چولھے جلیں کہ گھر ہی جلیں پر دھواں رہے 

نیرو نے بنسری کی نئی تان چھیڑ دی 

اب روم کا نصیب فقط داستاں رہے 

پانی سمندروں کا نہ چھلنی سے ماپیے 

ایسا نہ ہو کہ سارا کیا رائیگاں رہے 

مجھ کو سپرد خاک کرو اس دعا کے ساتھ 

آنگن میں پھول کھلتے رہیں اور مکاں رہے 

کاٹی ہے عمر رات کی پہنائیوں کے ساتھ 

ہم شہر بے چراغ میں اے بے کساں رہے 

آذرؔ ہر ایک گام پہ کاٹا ہے سنگ جبر 

ہاتھوں میں تیشہ سامنے کوہ گراں رہے

اعزاز احمد آذر