ساجد محمود رانا

 یوم پیدائش 10 اکتوبر

نگینے یونہی مٹی میں ملا کر پھینک دیتے ہیں

ہم اپنے شعر لوگوں کو سنا کر پھینک دیتے 

رعایا تو فقط غم سے یہاں دوچار ہوتی ہے

یہاں حاکم خوشی ہر اک دکھا کر پھینک دیتے ہیں

ستم تو دیکھ اس شہرِ سخن میں ہم ہوئے پیدا

جہاں دیوان چولہوں میں جلا کر پھینک دیتے ہیں 

وہی محبوب جو دل میں بٹھا کر تم کو رکھتے ہیں 

ّوہی محبوب اک دن پھر اٹھا کر پھینک دیتے

 ہیں

یونہی تو بن نہیں جاتے پہاڑوں کے سلاسل بھی

زمیں کی گود کو بنجر بنا کر پھینک دیتے ہیں

گل و گلزار ہوتے ہیں نہیں ہوتے خدا جانے

مگر دہقان بیجوں کو اٹھا کر پھینک دیتے ہیں

جو پیلے زرد پتے بوجھ بن جائیں انہیں ساجد

شجر کمزور شاخوں سے ہلا کر پھینک دیتے ہیں

ساجد محمود رانا

معین شاداب

 یوم پیدائش 10 اکتوبر

کس احتیاط سے سپنے سجانے پڑتے ہیں 

یہ سنگ ریزے پلک سے اٹھانے پڑتے ہیں 

بہت سے درد تو ہم بانٹ بھی نہیں سکتے 

بہت سے بوجھ اکیلے اٹھانے پڑتے ہیں 

یہ بات اس سے پتا کر جو عشق جانتا ہو 

پلوں کی راہ میں کتنے زمانے پڑتے ہیں 

ہر ایک پیڑ کا سایا نہیں ملا کرتا 

بلا غرض بھی تو پودے لگانے پڑتے ہیں 

کسی کو دل سے بھلانے میں دیر لگتی ہے 

یہ کپڑے کمرے کے اندر سکھانے پڑتے ہیں 

کہاں سے لاؤ گے تم اس قدر جبین نیاز 

قدم قدم پہ یہاں آستانے پڑتے ہیں

معین شاداب

ذکیہ شیخ مینا

 یوم پیدائش 10 اکتوبر

بند آنکھوں میں اتر میری نظر سے پہلے

بت تخیل میں بنالوں گی سحر سے پہلے

آتش عشق جگا دہکا سا شعلہ بن جا 

لو ضروری ہے بہت رقص شرر سے پہلے

یہ شکستہ پری پہنچائے گی تا حد افق

عزم ہو راسخ اگر وقت سفر سے پہلے

راستہ خود ہی بنا لے گا یہ رفتار کا جوش

گام اولی کا تذبذب ہے ڈگر سے پہلے

پرچم نور لئے تیرگئ شب سے لڑے

ہنس کے بجھتے ہیں دیے نور سحر سے پہلے 

بس تکبر نے ہی ابلیس کو ملعون کیا 

رب کا تھا خاص وہ تکفیر بشر سے پہلے

مینا آداب محبت سے سجا روح ونظر

اپنی ہستی کو مٹا پیش نظر سے پہلے

ذکیہ شیخ مینا

نثار ترابی

 یوم پیدائش 10 اکتوبر 1961

ابر صحرائے جاں تلاش کرے

پیاس اپنا جہاں تلاش کرے

ہر عقیدت کی ایک منزل ہے

ہر جبیں آستاں تلاش کرے

اپنے محور پہ رہ نہیں سکتی

جو زمیں آسماں تلاش کرے

عشق ڈھونڈے کہانیاں اپنی

حسن اپنا بیاں تلاش کرے

کوئی تو راستوں پہ نکلے بھی

کوئی تو کارواں تلاش کرے

کیا حقیقت پہ چل گیا افسوں

کیا یقیں بھی گماں تلاش کرے

کیا ستاروں سے جا ملیں آنکھیں

کیا نظر کہکشاں تلاش کرے

کس کو کردار کی تمنا ہے

کون اب داستاں تلاش کرے

جاؤ کہہ دو نثارؔ جا کے اسے

ہم سا اک مہرباں تلاش کرے

نثار ترابی

عفت زریں

 یوم پیدائش 10 اکتوبر 1958

اگر وہ مل کے بچھڑنے کا حوصلہ رکھتا

تو درمیاں نہ مقدر کا فیصلہ رکھتا

وہ مجھ کو بھول چکا اب یقین ہے ورنہ

وفا نہیں تو جفاؤں کا سلسلہ رکھتا

بھٹک رہے ہیں مسافر تو راستے گم ہیں

اندھیری رات میں دیپک کوئی جلا رکھتا

مہک مہک کے بکھرتی ہیں اس کے آنگن میں

وہ اپنے گھر کا دریچہ اگر کھلا رکھتا

اگر وہ چاند کی بستی کا رہنے والا تھا

تو اپنے ساتھ ستاروں کا قافلہ رکھتا

جسے خبر نہیں خود اپنی ذات کی زریںؔ

وہ دوسروں کا بھلا کس طرح پتا رکھتا

عفت زریں

مصطفی زیدی

 یوم پیدائش 10 اکتوبر 1929

کسی اور غم میں اتنی خلش نہاں نہیں ہے

غم دل مرے رفیقو غم رائیگاں نہیں ہے

کوئی ہم نفس نہیں ہے کوئی رازداں نہیں ہے

فقط ایک دل تھا اب تک سو وہ مہرباں نہیں ہے

مری روح کی حقیقت مرے آنسوؤں سے پوچھو

مرا مجلسی تبسم مرا ترجماں نہیں ہے

کسی زلف کو صدا دو کسی آنکھ کو پکارو

بڑی دھوپ پڑ رہی ہے کوئی سائباں نہیں ہے

انہیں پتھروں پہ چل کر اگر آ سکو تو آؤ

مرے گھر کے راستے میں کوئی کہکشاں نہیں ہے

مصطفی زیدی

منصور عباس

 یوم پیدائش 09 اکتوبر

دیارِ ضبط کا رستہ بنا کے مارا گیا 

میں اپنی آنکھ کو فاقہ سکھا کےمارا گیا

میں اپنی جان گنوا بیٹھاپہلی ہجرت میں 

میں اپنے جسم میں آیا اور آ کے مارا گیا

بدن تو روز بناتا تھا اُس بلوچن کا

مگر مَیں آج تو چہرہ بنا کے مارا گیا

وہ پگڑیوں کی زیارت کو آۓ تھے لیکن 

کوٸی وہاں پہ دوپٹہ دکھا کے مارا گیا 

تمام لوگ یزیدی تھے اور وہ سَیَّد

کسی کو ذات کا شجرہ بتا کے مارا گیا

وہ مٸےکَشوں کا علاقہ تھا اور مَیں پاگل

کسی جبین پہ سجدہ بنا کے مارا گیا

ہوا میں اڑتا رہا دن کو اور رات میں وہ

کسی چراغ میں چہرہ دکھا کے مارا گیا

مصور عباس

منموہن تلخ

 یوم پیدائش 09 اکتوبر 1931

یہ شہر شہر سر عام اب منادی ہے

نہ وہ رہے گا ملاقات کا جو عادی ہے

زمین دی ہے کھلی دھوپ دی ہوا دی ہے

بہ نام زندگی کیسی کڑی سزا دی ہے

میں اپنے آپ سے کیا پوچھتا ہوں رہ رہ کر

یہ کیوں لگے کہ کسی نے مجھے صدا دی ہے

ترا ہی روپ کوئی تھا یہاں جب آیا تھا

یہ دیکھ وقت نے اب شکل کیا بنا دی ہے

دعا سلام تو تھی رسم ربط سے تھی مراد

سو میرے شہر نے یہ رسم ہی اٹھا دی ہے

فقط صدا ہی سنو کیوں نظر نہ آئے گی

کہ اب تو بیچ کی دیوار بھی گرا دی ہے

تمام عمر نہ اس کو کسی نے پہچانا

جو اس کے منہ پہ تھی چادر وہ کیوں ہٹا دی ہے

یہ اب گھروں میں نہ پانی نہ دھوپ ہے نہ جگہ

زمیں نے تلخؔ یہ شہروں کو بد دعا دی ہے

منموہن تلخ

شجر ڈیروی

 یوم پیدائش 08 اکتوبر

فاصلہ عشق کی شدت کو بڑھا دیتا ہے

حوصلہ ہجر کو جینے کا خُدا دیتا ہے

نفس کو مار کے آسان نہیں ہے جینا

درد آتش ہے یہ تَن مَن کو جلا دیتا ہے

وقت لے جاتا ہے منزل کی طرف راہی کو

 کس کو معلوم ہے رب رزق کُجا دیتا ہے

عید کا یوم گُزرتا ہے شجرؔ فُونوں پر

صوت کا دَرد مگر یار رُلا دیتا ہے

شجرؔ ڈیروی

ڈاکٹر سید کاظم

 یوم پیدائش 08 اکتوبر

بے وجہ آن بان میں رہنے کی چیز ہے 

آوارگی اڑان میں رہنے کی چیز ہے 

پتلی کمر نشیلی نظر تل ہے ہونٹ پر

تیرا وجود دھیان میں رہنے کی چیز ہے 

دل کی نہ مان مان بس اپنے دماغ کی 

دل تو بس آسمان میں رہنے کی چیز ہے 

انسان کون کیا ہے اِسے کچھ خبر نہیں 

یہ آئینہ گمان میں رہنے کی چیز ہے 

کاظم نکل کے گھر سے ملا ہے یہی سراغ 

یہ زندگی مکان میں رہنے کی چیز ہے 

ڈاکٹر سید کاظم