سہیل اقبال

یوم پیدائش 21 جون 1972

جب بھی تیرا شباب لکھتا ہوں

حسرتوں کو عذاب لکھتا ہوں

تُو نے پوچھا نہ جو سوال کبھی

میں اُسی کا جواب لکھتا ہوں

کیا حقیقت ہے تیرے وعدوں کی

میں تو جیون کو خواب لکھتا ہوں

اپنے کھاتے میں ڈال کر کانٹے

تیری خاطر گلاب لکھتا ہوں

تجھ سے منسوب ہو ہی جاتی ہے

میں جو کوئی کتاب لکھتا ہوں

میرے نغموں میں رنج و غم ہی سہی

میں مگر ، لاجواب لکھتا ہوں

کانپ جاتا ہوں جب کبھی میں سہیلؔ

فکرِ روز ِحساب لکھتا ہوں

سہیل اقبال

شاعر علی شاعر

یوم پیدائش 20 جون 1966

چرچا ہر ایک آن ہے اردو زبان کا 

گرویدہ کل جہان ہے اردو زبان کا 

اس لشکری زبان کی عظمت نہ پوچھیے 

عظمت تو خود نشان ہے اردو زبان کا 

گمنامیوں کی دھوپ میں جلتا نہیں کبھی 

جس سر پہ سائبان ہے اردو زبان کا 

مشرق کا گلستاں ہو کہ مغرب کا آشیاں 

ویران کب مکان ہے اردو زبان کا 

سوداؔ و میرؔ و غالبؔ و اقبالؔ دیکھ لو 

ہر ایک پاسبان ہے اردو زبان کا 

اردو زبان میں ہے گھلی شہد کی مٹھاس 

لہجہ بھی مہربان ہے اردو زبان کا 

ترویج دے رہا ہے جو اردو زبان کو 

بے شک وہ باغبان ہے اردو زبان کا 

مہمان کہہ رہا ہے بڑا خوش نصیب ہے 

جو شخص میزبان ہے اردو زبان کا 

لوگو کہیں بھی اس میں پس و پیش کچھ نہیں 

اک معترف جہان ہے اردو زبان کا 

بولی ہے رابطے کی یہی جوڑتی ہے دل 

ہر دل میں ایسا مان ہے اردو زبان کا 

وسعت پذیر دامن اردو ہے آج بھی 

ہر گوشہ اک جہان ہے اردو زبان کا 

کرتا ہے آبیاری لہو سے ادیب جو 

وہ دل ہے جسم و جان ہے اردو زبان کا 

آئیں رکاوٹیں جو ترقی میں اس کی کچھ 

سمجھو یہ امتحان ہے اردو زبان کا 

پائے گا جلد منزل مقصود بالیقیں 

جاری جو کاروان ہے اردو زبان کا 

عزت سخنوران ادب کی اسی ہے 

شاعرؔ بھی ترجمان ہے اردو زبان کا

شاعر علی شاعر

 

محبوب راہی

یوم پیدائش 20 جون 1939

اچھے نہیں ہیں وقت کے تیور مرے عزیز

رہنا ہے اپنی کھال کے اندر مرے عزیز

تیری منافقت پہ مجھے کوئی شک نہیں

میرے رفیق میرے برادر مرے عزیز

آ تیری تشنگی کا مداوا ہے میرے پاس

میرا لہو حلال ہے تجھ پر مرے عزیز

احساس جس کا نام ہے وہ چیز مستقل

چبھتی ہے میرے ذہن کے اندر مرے عزیز

اور اس میں تیر کر مجھے ہونا ہے سرخ رو

درپیش ہے لہو کا سمندر مرے عزیز

نادان واہموں کے تعاقب سے باز آ

کوئی نہیں کسی کا یقیں کر مرے عزیز

ممکن جو ہو تو اس سے رہائی دلا مجھے

مجھ پر ہے بار دوش مرا سر مرے عزیز

اظہار حق سے باز کب آتے ہیں ایسے لوگ

راہیؔ ہو یا ہوں شادؔ و مظفرؔ مرے عزیز

محبوب راہی

 

شمیم عباس

یوم پیدائش 19 جون 1948

بڑی سرد رات تھی کل مگر بڑی آنچ تھی بڑا تاؤ تھا

سبھی تاپتے رہے رات بھر ترا ذکر کیا تھا الاؤ تھا

وہ زباں پہ تالے پڑے ہوئے وہ سبھی کے دیدے پھٹے ہوئے

بہا لے گیا جو تمام کو مری گفتگو کا بہاؤ تھا

کبھی مے کدہ کبھی بت کدہ کبھی کعبہ تو کبھی خانقاہ

یہ تری طلب کا جنون تھا مجھے کب کسی سے لگاؤ تھا

چلو مانا سب کو تری طلب چلو مانا سارے ہیں جاں بلب

پہ ترے مرض میں یوں مبتلا کہیں ہم سا کوئی بتاؤ تھا

یہ مباحثے یہ مناظرے یہ فساد خلق یہ انتشار 

جسے دین کہتے ہیں دین دار مری روح پر وہی گھاؤ تھا

مجھے کیا جنون تھا کیا پتا جو جہاں کو روندتا یوں پھرا

کہیں ٹک کے میں نے جو دم لیا تری ذات ہی وہ پڑاؤ تھا

شمیم عباس 

مرزا راحل

یوم پیدائش 19 جون 

ڈھونڈ لیتا ہوں وجہ کوئی نبھانے کے لیے

ورنہ باتیں ہیں کئی چھوڑ کے جانے کے لیے

ہم تھے خود دار سو گمنام رہے ساری عمر 

لوگ کم ظرف بنے نام کمانے کے لیے 

تیرے میسج کو سنبھالا ہے بڑی مدت سے 

دل مچل جائے تو اوقات دکھانے کے لیے 

تو یہ سمجھیں کہ اثر دل پہ نہیں ہوتا ہے

جب کہ پھر موت تو عبرت ہے زمانے کے لیے 

وہ جو بے نام سا اک ربط تھا اب ختم کریں 

خط کے اوراق نکالے ہیں جلانے کے لیے

جب ترے شہر میں عشاق کا مجمع ہوگا

ہم بھی آئیں گے وہاں شعر سنانے کے لیے 

ٹھوکریں کھا کے جو سجدے میں گرا اتنا کہا 

معذرت میرے خدا دیر سے آنے کے لیے

 مرزا راحل

۔

 

آدتیہ پنت ناقد

یوم پیدائش 19 جون 1971

صداقت کی یہاں عزت نہیں ہے 

وفاداری کی کچھ قیمت نہیں ہے 

جہاں سے وہ گیا تھا میں وہیں ہوں 

مگر جینے میں وہ لذت نہیں ہے 

زباں پہ تلخیاں آنکھوں میں غصہ 

مگر کردار میں خست نہیں ہے 

وقار اپنا نہیں کوتاہ لیکن 

ترے رتبے سی بھی قامت نہیں ہے 

رہے مٹی کی خوشبو یاد ہر دم 

تو سانسیں روکتی غربت نہیں ہے 

جہالت میں پلی دنیا میں شاید 

تعقل سے بڑی نعمت نہیں ہے 

چلا چل سر اٹھا کر یار ناقدؔ 

لگی اب تک کوئی تہمت نہیں ہے

آدتیہ پنت ناقد

ابرار کرتپوری

یوم وفات 18جون 2022

نعت

ارتقا کا ،روشنی کا ،خواب کا، تعبیر کا

دینِ احمدؐ راستہ ہے سر بسر تعمیر کا 

روشنی کی منزلیں پنہاں علومِ نو میں ہیں

ہے حصول ِعلم و دانش راستہ تنویر کا

آئیے اب چاند تاروں پر کمندیں ڈال دیں

آیۂ قرآں میں ہم کو حکم ہے تسخیر کا

عظمت ِانساں بھی معراج کی بے مثل ِشب 

اور کمالِ ارتقا سائنس کی تدبیر کا

سب کتابوں سے بشارت جن کے آنے کی ملی

نامِ احمدؐ ہے ہمارے صاحب ِتطہیر کا 

آپؐ کے کردار کا سکہّ جما ہے ہر طرف

دو جہاں میں غلغلہ ہے خلق کی تاثیر کا

بھیجتا ہے خالقِ اکبر محمدؐ پر درود

ہے علَم اونچا مرے سرکار کی توقیر کا

ابرار کرتپوری

اظہر نواز

یوم پیدائش 18 جون 1995

ملتے جلتے ہیں یہاں لوگ ضرورت کے لئے 

ہم ترے شہر میں آئے ہیں محبت کے لئے 

وہ بھی آخر تری تعریف میں ہی خرچ ہوا 

میں نے جو وقت نکالا تھا شکایت کے لئے 

میں ستارہ ہوں مگر تیز نہیں چمکوں گا 

دیکھنے والے کی آنکھوں کی سہولت کے لئے 

تم کو بتلاؤں کہ دن بھر وہ مرے ساتھ رہا 

ہاں وہی شخص جو مشہور ہے عجلت کے لئے 

سر جھکائے ہوئے خاموش جو تم بیٹھے ہو 

اتنا کافی ہے مرے دوست ندامت کے لئے 

وہ بھی دن آئے کہ دہلیز پہ آ کر اظہرؔ 

پاؤں رکتے ہیں مرے تیری اجازت کے لئے

اظہر نواز

ادیب سہیل

یوم پیدائش 18 جون 1927

کیا دور ہے کہ جو بھی سخنور ملا مجھے 

گم گشتہ اپنی ذات کے اندر ملا مجھے 

کس پیار سے گیا تھا تری آستیں کے پاس 

شاخ حنا کی چاہ میں خنجر ملا مجھے 

اس ظلمت حیات میں اک لفظ پیار کا 

جب مل گیا تو ماہ منور ملا مجھے 

صورت‌ گران عصر کا تھا انتظار کش 

تیری رہ طلب میں جو پتھر ملا مجھے 

روز ازل سے کار گہہ ہست میں سہیلؔ 

دل ہی غم حیات کا محور ملا مجھے

ادیب سہیل

بشریٰ اعجاز

یوم پیدائش 18 جون 1959

محبت میں کوئی صدمہ اٹھانا چاہئے تھا 

بھلایا تھا جسے وہ یاد آنا چاہئے تھا 

گری تھیں گھر کی دیواریں تو صحن دل میں ہم کو 

گھروندے کا کوئی نقشہ بنانا چاہئے تھا 

اٹھانا چاہئے تھی راکھ شہر آرزو کی

پھر اس کے بعد اک طوفان اٹھانا چاہئے تھا 

کوئی تو بات کرنا چاہئے تھی خود سے آخر

کہیں تو مجھ کو بھی یہ دل لگانا چاہئے تھا 

کبھی تو اہتمام آرزو بھی تھا ضروری 

کوئی تو زیست کرنے کا بہانا چاہئے تھا 

مری اپنی اور اس کی آرزو میں فرق یہ تھا 

مجھے بس وہ اسے سارا زمانہ چاہئے تھا

بشریٰ اعجاز