فرحت ناز

یوم پیدائش 20 جنوری 1978

شمع کی لو سے جو گزرتے ہیں

وہ پتنگے ہی جلتے مرتےہیں

ہم ہیں مانند اک گھروندے کے

جابجا ٹوٹتے بکھرتے ہیں

جوں ہی کروٹ بدلتا ہے سورج

سائے دیوار سے اترتے ہیں

ناز ہم موم کا بدن لے کر

بے خطر آگ سے گزرتے ہیں

فرحت ناز

محشر فیض آبادی

یوم پیدائش 20 جنوری 1958

مرے کھانے سے گھبرایا بہت ہے 

وہ دعوت دے کے پچھتایا بہت ہے 

لفافہ دیکھ کر بولا وہ مجھ سے 

دیا کم ہے میاں کھایا بہت ہے 

محشر فیض آبادی

ایم علی

یوم پیدائش 20 جنوری 1946

بجا رہا ہے تہہِ آب جلترنگ کوئی

ہر ایک موج میں ملتی ہے گنگناہٹ سی

ایم علی

جنید حزین لاری

یوم پیدائش 20 جنوری 1933

برپا ہیں عجب شورشیں جذبات کے پیچھے 

بے تاب ہے دل شوق ملاقات کے پیچھے 

جن کو نہ سمجھ پائے ہم ارباب نظر بھی 

سو راز ہیں اس شوخ کی ہر بات کے پیچھے 

اس ٹھوس حقیقت سے تعرض نہیں ممکن 

اک صبح تجلی ہے ہر اک رات کے پیچھے 

ارباب وطن ہم کو ذرا یہ تو بتائیں 

کن ذہنوں کی سازش ہے فسادات کے پیچھے 

منظر ہے لہو رنگ سلگتی ہیں فضائیں 

شعلوں کا وہ سیلاب ہے برسات کے پیچھے 

ہم ان کو سمجھتے ہیں حزیںؔ کہہ نہیں سکتے 

اسباب جو ہیں تلخئ حالات کے پیچھے 

جنید حزین لاری

محمد اسماعیل آسی آروی

یوم پیدائش 19 جنوری 1921

نہ قہقہہ نہ تبسم نہ اشک پیہم ہے 

جہاں پہ ہم ہیں وہاں کچھ عجیب عالم ہے 

جو پہلے آج سے تھا آج بھی وہی غم ہے 

یہ دور جام نہیں ہے فریب پیہم ہے 

برا نہ مانو تو اک بات تم سے عرض کروں 

تمہارا لطف بہ اندازۂ ستم کم ہے 

یہ صبح و شام کی مستی یہ نشۂ شب و روز 

ترے بغیر کوئی کیف ہو مجھے سم ہے 

سر نیاز کبھی اس کے سامنے نہ جھکا 

اسی قصور پہ ہم سے زمانہ برہم ہے 

ہے بات بات پہ ہجو سبو و ساغر و مے 

جناب حضرت‌ واعظ سے ناک میں دم ہے 

نگاہ ناز کو تکلیف التفات نہ دو 

کہ اب تو زخم جگر بے نیاز مرہم ہے 

خطا ضرور کوئی اس سے بھی ہوئی ہوگی 

کہ آخر آسیؔ خستہ بھی ابن آدم ہے 

محمد اسماعیل آسی آروی

ناظم قمر

یوم پیدائش 19 جنوری 1937

دور حاضر کا یہ کردار خدا خیر کرے 

ماں سے بیٹے کو نہیں پیار خدا خیر کرے 

پیار اوروں میں تو ہم بانٹ رہے تھے کل تک 

آج آپس میں ہے تکرار خدا خیر کرے 

بسکہ آباد ہمارے ہی لہو سے ہے چمن 

ہم چمن کے نہیں حق دار خدا خیر کرے 

ایک نا اہل ہے اس وقت چمن کا مالی 

پھول بھی تو نہیں بیدار خدا خیر کرے 

چھوٹ کر ہاتھ سے دو چار گریں تو کیا ہو 

ایک تھالی کی یہ جھنکار خدا خیر کرے 

نامکمل ہے نشیمن مرا لیکن بجلی 

بن گئی طالب دیدار خدا خیر کرے 

جانے کب کیسے قمرؔ پیاس بجھے گی اس کی 

پی رہی ہے لہو تلوار خدا خیر کرے

ناظم قمر

 

تبسم صدیقی

یوم پیدائش 18 جنوری 1964

یہ جو ہم اختلاف کرتے ہیں 

آپ کا اعتراف کرتے ہیں 

آؤ دھوتے ہیں دل کے داغوں کو 

آؤ آئینے صاف کرتے ہیں 

تم کو خوش دیکھنے کی خاطر ہم 

بات اپنے خلاف کرتے ہیں 

مجرم عشق تو بھی ہے اے دوست 

جا تجھے ہم معاف کرتے ہیں 

لفظ کے گھاؤ ہوں تو کیسے بھریں 

لفظ گہرا شگاف کرتے ہیں

تبسم صدیقی

فوزیہ اختر ازکی

یوم پیدائش 17 جنوری

مرے کانوں میں ان کے لہجے کی پھر چاشنی اترے

زباں سے ان کی ہر اک بات بن کے نغمگی اترے

سدا روشن کیا ہے دل کو جن کی یاد سے ہم نے

ہمارے نام پر ان کے بھی دل میں روشنی اترے

مرے گلشن سے ہجرت پر خزاں مجبور ہو جائے

ہر اک برگ و شجر پر اس طرح سے تازگی اترے

سدا تہمت لگاتے ہیں وہ مجھ پر کیا کروں مولا

میں مریم تو نہیں جس کی صفائی میں وحی اترے

یہ مانا بخت میں میرے ازل سے رات ہے لیکن

کبھی تو میرے آنگن میں بھی اجلی چاندی اترے

میں خود کو آئینے میں دیکھ کر حیران رہ جاؤں

تمہارے پیار سے چہرے پہ ایسی دلکشی اترے

کسی ہمدرد کا کاندھا میسر فوزیہ کو ہو

تھکن برسوں کی اس کے جسم و جاں سے بھی کبھی اترے

فوزیہ اختر ازکی

حکیم منظور

یوم پیدائش 17 جنوری 1937

ہر ایک آنکھ کو کچھ ٹوٹے خواب دے کے گیا 

وہ زندگی کو یہ کیسا عذاب دے کے گیا 

نہ دے سکا مجھے وسعت سمندروں کی مگر 

سمندروں کا مجھے اضطراب دے کے گیا 

وہ کس لیے مرا دشمن تھا جانے کون تھا وہ 

جو آنکھ آنکھ مسلسل سراب دے کے گیا 

خلا کے نام عطا کر کے چھاؤں کی میراث 

مجھے وہ جلتا ہوا آفتاب دے کے گیا 

وہ پیڑ اونچی چٹانوں پہ اب بھی تنہا ہیں 

انہی کو ساری متاع سحاب دے کے گیا 

ہر ایک لفظ میں رکھ کر سراب معنی کا 

ہر ایک ہاتھ میں وہ اک کتاب دے کے گیا 

میں کل ہوں اور تو جز میں بھی کل ہے اے منظورؔ 

بچھڑتے وقت مجھے یہ خطاب دے کے گیا

حکیم منظور

رشید ساقی

یوم پیدائش 17 جنوری 1926

سل گئے ہونٹ اگر آنکھ ہی نم ہو جائے

کاش جو بوجھ میرے دل پہ ہے کم ہو جائے

کوئی انداز تو جینے کا ہو انسان کے پاس

جسے راحت نہ ملے خوگرِغم ہو جائے

اس توقع پر ستم اس کے سہے جاتے ہیں

جانے کس وقت وہ مائل بہ کرم ہو جائے

سر فرازی مجھے مل جائے زمانے بھر کی

مرا سر آپؐ کی دہلیز پہ خم ہو جائے

مری تحریر ہو رنگین کہ سادہ ، کچھ ہو

کیفیت دل کی کسی طور رقم ہو جائے 

نہ وہ احباب ،نہ وہ صورت حالات، نہ ہم 

کیسے تسکین کا سامان بہم ہو جائے

مری فطرت کو عطا کر وہ بصیرت جس سے

دل جہاں بیس صفتِ ساغر جم ہو جائے

شاعری حسن صداقت کی ہو مظہر ساقی

مرا فن باعثِ توقیر قلم ہو جائے 

رشید ساقی