پنڈت برج موہن دتاتریہ کیفی

 یوم پیدائش 13 دسمبر 1866

اک خواب کا خیال ہے دنیا کہیں جسے

ہے اس میں اک طلسم تمنا کہیں جسے

اک شکل ہے تفنن طبع جمال کی

اس سے زیادہ کچھ نہیں دنیا کہیں جسے

خمیازہ ہے کرشمہ پرستئ دہر کا

اہل زمانہ عالم عقبیٰ کہیں جسے

اک اشک ارمیدۂ ضبط غم فراق

موج ہوائے شوق ہے دریا کہیں جسے

باوصف ضبط راز محبت ہے آشکار

عقدہ ہے دل کا عقد ثریا کہیں جسے

برہم زن حجاب ہے خود رفتگی حسن

اک شان بے خودی ہے زلیخا کہیں جسے

عکس صفائے قلب کا جوہر ہے آئینہ

وارفتۂ جمال خود آرا کہیں جسے

رم شیوہ ہے صنم تو ہے رم آشنا یہ دل

حاصل ہے مجھ کو عیش مہیا کہیں جسے

خونی کفن یہ سینت کے رکھا ہے کس لیے

قاتل وہ ہے کہ رشک مسیحا کہیں جسے

سب کچھ ہے اور کچھ بھی نہیں دہر کا وجود

کیفیؔ یہ بات وہ ہے معما کہیں جسے

  پنڈت برج موہن دتاتریہ کیفی