دتا تریہ کیفی

یوم پیدائش 01 نومبر 1955

اک خواب کا خیال ہے دنیا کہیں جسے 

ہے اس میں اک طلسم تمنا کہیں جسے 

اک شکل ہے تفنن طبع جمال کی 

اس سے زیادہ کچھ نہیں دنیا کہیں جسے 

خمیازہ ہے کرشمہ پرستئ دہر کا 

اہل زمانہ عالم عقبیٰ کہیں جسے 

اک اشک ارمیدۂ ضبط غم فراق 

موج ہوائے شوق ہے دریا کہیں جسے 

باوصف ضبط راز محبت ہے آشکار 

عقدہ ہے دل کا عقد ثریا کہیں جسے 

برہم زن حجاب ہے خود رفتگی حسن 

اک شان بے خودی ہے زلیخا کہیں جسے 

عکس صفائے قلب کا جوہر ہے آئینہ 

وارفتۂ جمال خود آرا کہیں جسے 

رم شیوہ ہے صنم تو ہے رم آشنا یہ دل 

حاصل ہے مجھ کو عیش مہیا کہیں جسے 

سب کچھ ہے اور کچھ بھی نہیں دہر کا وجود 

کیفیؔ یہ بات وہ ہے معما کہیں جسے

دتا تریہ کیفی