امر روحانی

 یوم پیدائش 17 جون

خود کو اوقات سے گراتی ہے

برق جب آشیاں جلاتی ہے

ہم مسافر ہیں ایسی منزل کے

دو جہانوں کو جو ملاتی ہے

لوگ مجذوب جانتے ہیں جسے

آگہی رازداں بناتی ہے

روشنی ، تیرگی بہ ظرفِ عطا

اک دکھاتی ہے، اک چھپاتی ہے

زرد پتوں کی رسمِ ماتم پر

بادِ صر سیٹیاں بجاتی ہے

لفظ تو پتلیوں کے جیسے ہیں

یہ زباں ڈوریاں ہلاتی ہے

عاشقی ہے مثالِ خود زدگی

آگ جلتی ہے پھر جلاتی ہے

تشنگی اور طلب الگ ہیں امـؔر

ایک مٹتی ہے اک مٹاتی ہے

امر رُوحانی

نظام ہاتف

 یوم پیدائش 16 جون 1949

کس نے قسمت میں مرے خانہ بدوشی لکھ دی

اب کے ہجرت کروں ایسی کہ مقامی ہو جاؤں

نظام ہاتف

شاعر علی راحل

 وہ مَلا رات خواب میں جیسے

 تیرتا عکس آب میں جیسے

دیکھ کر اُس کو دل ہُوا بےچین

وه بھی تها اضطراب میں جیسے

یاد نے چھیڑے تار یوں دل کے

دُھن بجی ہَو رُباب میں جیسے

اِسطرح گھل گیا ہے وہ مجھ میں

گھلتی شکّر ہے آب میں جیسے

کھوج میں اُس کی دَربدر بهٹکے 

پیاس کوئی سَراب میں جیسے 

ذہن و دل پر وہ نقش ہے رَاحِلؔ

حَرف کوئی کتاب میں جیسے

شاعر علی رَاحِلؔ 

محمد عارف

 یہ تھکی تھکی سی مُسافتیں اِنہیں ہو سکے تو گُزار دے 

میری چارہ گر، میری ہمسفر، مجھے پِھر نویدِ بہار دے

مِری زندگی کے یہ سِلسِلےکہیں مَرقدوں سے تھےجا مِلے 

مَیں کبھی کا اِن میں اُتر گیامُجھےتُوبھی مُشتِ غُبار دے

یہ اندھیری رات یہ وحشتیں یہ شِکستہ چاپ یہ آہٹیں

تِری سِمت میرےقدم اُٹھیں مجھےحوصلے وہ اُدھار دے

کوئی کِس کے کِتنا قریب ہے یہ تو اپنا اپنا نصیب ہے

مِری ہم نفس، مِرے پاس آ مِری زندگی کو سنوار دے

سَرِ راہ خود کو تو کھو دیا رگِ جاں میں درد سمو دیا

تِری حدسے پِھرنہ نِکل سکوں مجھےبازوؤں کےحصار دے

یہ جوقُربتوں میں ہیں فاصلےجومِلےبھی کوئی توکیامِلے 

تِری نذر کرتا ہُوں چاہتیں مجھے نفرتوں کے مَزار دے

محمد عارف

پیر محمد علی نعیمی

 نعت رسول صلی اللہ علیہ و 

کیا تذکرہ کروں میں نبی کی حیات کا

ذاکر ہے خود خدا مرے آقا کی ذات کا

ان کے طفیل رب نے بناکر یہ کائنات

مختار کردیا ہے انہیں کائنات کا

آقا کا یہ کرم بھی بڑا لا زوال ہے

ملتا رہے گا فیض سدا معجزات کا

نور نبی سے ملتی ہے عالم کو روشنی

صدقہ ہے یہ حضور کی ذات و صفات کا

فرمان مصطفی تو ہے ہر دور میں اٹل

کوئی بدل نہیں مرے آقا کی بات کا

آقا کی اس حدیث میں جینے کا ہے ہنر

خاموشی میں ہی رکھا ہے رستہ نجات کا

میرا جو نام ان کے غلاموں میں آگیا

احسان ہے علی پہ یہ آقا کی نعت کا

پیر محمد علی نعیمی

ضیاء رشیدی

 نفرتوں کا گرم اب بازار ہے 

الفتوں کی گررہی دیوار ہے

شکل و صورت سے نہیں کوئی غرض 

اصل تو انسان کا کردار ہے

ہے کرونا وائرس کیسی وبا 

یار سے ہی بھاگتا اب یار ہے

کیسے آئے نیند اب انسان کو 

ہرطرف لاشوں کا جب انبار ہے

ہر طرف مردوں پہ ماتم دیکھ کر 

خوف میں ڈوبا ہوا سنسار ہے

ہر کوئی اک دوسرے سے بھاگتا 

کون کس کا ا ب یہاں غم خوار ہے

موت کی خبروں کو سن کر اے ضیاء 

دل مرا بھی اب بہت بیزار ہے

ضیاء رشیدی

ظہور ظہیرآبادی

 زندگی میں نہ بچھڑیں گے تم سے کبھی

یہ جو کہتا تھا وہ بھی جدا ہو گیا

ظہور ظہیرآبادی

یشب تمنا

 یوم پیدائش 16 جون 1957

پھر بھی نہیں کہتا کہ وہ بہتر نہیں نکلے

باہر کئی منظر تھے جو اندر نہیں نکلے

تا عمر اب اندر ہی کہیں گرتے رہیں گے

رویا ہوں تو آنسو مرے باہر نہیں نکلے

پتھر کے زمانے سے نکل آئے ہیں لیکن

سوچوں سے ہماری ابھی پتھر نہیں نکلے

سر پھوڑتے رہتے ہیں سر شہر الم میں

لیکن سر دیوار جنوں در نہیں نکلے

اک بار یہ دل خانماں برباد ہوا تھا

لگتا ہے ابھی دل سے وہی ڈر نہیں نکلے

کیا ہے کہ اگر میں کوئی فرہاد نہ نکلا

تم بھی تو مقدر کے سکندر نہیں نکلے

دریائے محبت کا مجھے دعویٰ نہیں تھا

پر تم بھی محبت میں سمندر نہیں نکلے

یشب تمنا

شہر یار

 یوم پیدائش 16 جون 1936

دل میں رکھتا ہے نہ پلکوں پہ بٹھاتا ہے مجھے

پھر بھی اک شخص میں کیا کیا نظر آتا ہے مجھے

رات کا وقت ہے سورج ہے مرا راہنما

دیر سے دور سے یہ کون بلاتا ہے مجھے

میری ان آنکھوں کو خوابوں سے پشیمانی ہے

نیند کے نام سے جو ہول سا آتا ہے مجھے

تیرا منکر نہیں اے وقت مگر دیکھنا ہے

بچھڑے لوگوں سے کہاں کیسے ملاتا ہے مجھے

قصۂ درد میں یہ بات کہاں سے آئی

میں بہت ہنستا ہوں جب کوئی سناتا ہے مجھے

شہریار

شاعر جمالی

 یوم پیدائش 15 جون 1943

مرے نصیب کا لکھا بدل بھی سکتا تھا

وہ چاہتا تو مرے ساتھ چل بھی سکتا تھا

یہ تو نے ٹھیک کیا اپنا ہاتھ کھینچ لیا

مرے لبوں سے ترا ہاتھ جل بھی سکتا تھا

اڑاتی رہتی ہے دنیا غلط سلط باتیں

وہ سنگ دل تھا تو اک دن پگھل بھی سکتا تھا

اتر گیا ترا غم روح کی فضاؤں میں

رگوں میں ہوتا تو آنکھوں سے ڈھل بھی سکتا تھا

میں ٹھیک وقت پہ خاموش ہو گیا ورنہ

مرے رفیقوں کا لہجہ بدل بھی سکتا تھا

انا کو دھوپ میں رہنا پسند تھا ورنہ

ترے غرور کا سورج تو ڈھل بھی سکتا تھا

رگڑ سکی نہ مری پیاس ایڑیاں ورنہ

ہر ایک ذرے سے چشمہ ابل بھی سکتا تھا

پسند آئی نہ ٹوٹی ہوئی فصیل کی راہ

میں شہر تن کی گھٹن سے نکل بھی سکتا تھا

وہ لمحہ جس نے مجھے ریزہ ریزہ کر ڈالا

کسی کے بس میں جو ہوتا تو ٹل بھی سکتا تھا

شاعر جمالی