دیشمکھ ابن مقصود مہروی

 ٹیپو سلطان کی یوم پیدائش کے حوالے سے ایک مطلع۔۔۔۔

تاریخ کے اوراق میں تابندہ رہیں گے 

مرجائیں گے، دنیا میں مگر زندہ رہیں گے 

دیشمکھ ابن مقصود مہروی

احمد ندیم قاسمی

 یوم پیدائش 20 نومبر 1916

میں کسی شخص سے بیزار نہیں ہو سکتا 

ایک ذرہ بھی تو بیکار نہیں ہو سکتا 

اس قدر پیار ہے انساں کی خطاؤں سے مجھے 

کہ فرشتہ مرا معیار نہیں ہو سکتا 

اے خدا پھر یہ جہنم کا تماشا کیا ہے 

تیرا شہکار تو فی النار نہیں ہو سکتا 

اے حقیقت کو فقط خواب سمجھنے والے 

تو کبھی صاحب اسرار نہیں ہو سکتا 

تو کہ اک موجۂ نکہت سے بھی چونک اٹھتا ہے 

حشر آتا ہے تو بیدار نہیں ہو سکتا 

سر دیوار یہ کیوں نرخ کی تکرار ہوئی 

گھر کا آنگن کبھی بازار نہیں ہو سکتا 

راکھ سی مجلس اقوام کی چٹکی میں ہے کیا 

کچھ بھی ہو یہ مرا پندار نہیں ہو سکتا 

اس حقیقت کو سمجھنے میں لٹایا کیا کچھ 

میرا دشمن مرا غم خوار نہیں ہو سکتا 

میں نے بھیجا تجھے ایوان حکومت میں مگر 

اب تو برسوں ترا دیدار نہیں ہو سکتا 

تیرگی چاہے ستاروں کی سفارش لائے 

رات سے مجھ کو سروکار نہیں ہو سکتا 

وہ جو شعروں میں ہے اک شے پس الفاظ ندیمؔ 

اس کا الفاظ میں اظہار نہیں ہو سکتا 

احمد ندیم قاسمی

احمد علی برقی اعظمی

 یاد رفتگاں: بیاد فیض احمد فیضؔ مرحوم

یوم پیدائش: ۱۳ فروری ۱۹۱۱

یوم وفات: ۲۰ نومبر ۱۹۸۴

فیضؔ تھے دنیائے اردو کے دلوں پر حکمراں 

ہیں جہاں فکر و فن میں اُن کی عظمت کے نشاں

اُن کے ہیں شعروسخن میں جو نقوشِ جاوداں 

آج بھی ہیں اور رہیں گے زیبِ تاریخِ جہاں

اُن کی تخلیقات ہیں اردو ادب کا شاہکار

جو ہیں دنیائے ادب میں مرجعِ دانشوراں

اُن کی غزلیں اور نظمیں شہرۂ آفاق ہیں 

ہوتے ہیں محظوظ یکساں جن سے سب پیر و جواں

شخصیت تھی اُن کی اپنے آپ میں اک انجمن

عہدِ نو میں تھے وہ اردو کے امیرِ کارواں

تھے شعورِ فن سے اپنے خسروِ ملکِ سخن

فکر سے تھے اپنی وہ سب کے دلوں پر حکمراں

فیض اور اردو ادب اب لازم و ملزوم ہیں 

باہمی رشتہ ہے اُن کا جس طرح ہوں جسم و جاں

جاری و ساری رہے گا فیضؔ کا یہ فیضِ عام

ہے مُزین فیضؔ سے اردو ادب کی داستاں

تھے وہ برقی آبروئے خطۂ برِ صغیر

جن کے ہیں آثارِ ادبی ایک گنجِ شایگاں

احمد علی برقیؔ اعظمی

عرفان اللہ عرفان

 یوم پیدائش 20 نومبر 1974

ٹوٹتے خواب کی تعبیر سے اندازہ کیا

میں نے شاید ذرا تاخیر سے اندازہ کیا 

دونوں جانب سے مسلمان تھے مرنے والے

آپ نے نعرہء تکبیر سے اندازہ کیا؟ 

میرے کمرے میں کوئی آیا نہیں میرے بعد

گرد آلود سی تصویر سے اندازہ کیا

جھوٹ کے پائوں بھی ہوتے ہیں اگر تو بولے

آج میں نے تری تقریر سے اندازہ کیا

آپ جادو سے بنا لیتے ہیں مٹی سونا

آپ کی پھیلتی جاگیر سے اندازہ کیا 

آپ تو اپنی خوشی سے ہیں غلام ابن ِ غلام 

آپ کی قیمتی زنجیر سے اندازہ کیا

عرفان اللہ عرفان 

تسنیم فاروقی

 یوم پیدائش 19 نومبر 1915

پھر ترے ہجر کے جذبات نے انگڑائی لی

تھک کے دن ڈوب گیا رات نے انگڑائی لی

جیسے اک پھول میں خوشبو کا دیا جلتا ہے

اس کے ہونٹوں پہ شکایات نے انگڑائی لی

سرخ ہی سرخ ہے اس شہر کا منظر نامہ

امن ہوتے ہی فسادات نے انگڑائی لی

ہم بھی اس جنگ میں فی الحال کیے لیتے ہیں صلح

دیکھا جائے گا جو حالات نے انگڑائی لی

گرمیٔ آہ سے نم ہو گئیں آنکھیں اے دوست

بڑھ گیا حبس تو برسات نے انگڑائی لی

فاصلہ رنج و مسرت میں بس اک سانس کا ہے

مسکرائے تھے کہ صدمات نے انگڑائی لی

جھیل جیسی وہ چمکتی ہوئی آنکھیں تسنیمؔ

ان میں ڈوبے تھے کہ نغمات نے انگڑائی لی

تسنیم فاروقی

خان امیر تابشِ نیازی

 یوم پیدائش 19 نومبر

یہ کون رو رہا تھا تھوڑی سی دیر پہلے

ماتَم سا ہو رہا تھا تھوڑی سی دیر پہلے

تُجھ کو بَتانا ہو گا وہ کون تھا تُو جِس کے

سَپنوں میں کھو رہا تھا تھوڑی سی دیر پہلے

محبوب سے مخاطِب ہو کر مَیں داغ دِل کے

اَشکوں سے دھو رہا تھا تھوڑی سی دیر پہلے

پُھولوں پہ سونے والا جانے وہ آج کیسے

کانٹوں پہ سو رہا تھا تھوڑی سی دیر پہلے

روتے ہوئے میں تابِشؔ پڑھ کر تُمہارے خط کا

کاغذ بھِگو رہا تھا تھوڑی سی دیر پہلے

خان اَمیر تابِش نیازی

ایوب اختر

 یوم پیدائش 19 نومبر 1977

آپ کا انتظار اچھا لگا

دل کو یہ اعتبار اچھا لگا

آپ کو دیکھ کر کہا دل نے 

حسن کا شاہکار اچھا لگا

آپ آئے مزاج پرسی کو 

آج اپنا بخار اچھا لگا

تو ملا ہے تو دل میں پھول کھلے

اے غرورِ بہار اچھا لگا

تونے میری جو دل نوازی کی

اے مرے غم گسار اچھا لگا

  ایوب اختر

افتخار امام صدیقی

 یوم پیدائش 19 نومبر 1947

تو نہیں تو زندگی میں اور کیا رہ جائے گا

دور تک تنہائیوں کا سلسلہ رہ جائے گا

کیجئے کیا گفتگو کیا ان سے مل کر سوچئے

دل شکستہ خواہشوں کا ذائقہ رہ جائے گا

درد کی ساری تہیں اور سارے گزرے حادثے

سب دھواں ہو جائیں گے اک واقعہ رہ جائے گا

یہ بھی ہوگا وہ مجھے دل سے بھلا دے گا مگر

یوں بھی ہوگا خود اسی میں اک خلا رہ جائے گا

دائرے انکار کے اقرار کی سرگوشیاں

یہ اگر ٹوٹے کبھی تو فاصلہ رہ جائے گا

افتخار امام صدیقی

سرمد صہبائی

 یوم پیدائش 19 نومبر 1945

مرنے کا پتہ دے مرے جینے کا پتہ دے

اے بے خبری کچھ مرے ہونے کا پتہ دے

اک دوسرے کی آہٹوں پہ چلتے ہیں سب لوگ

ہے کوئی یہاں جو مجھے رستے کا پتہ دے

خود آپ سے بچھڑا ہوں میں اس اندھے سفر میں

اے تیرگی شب مرے سائے کا پتہ دے

اس آس پہ ہر آئینے کو جوڑ رہا ہوں

شاید کوئی ریزہ مرے چہرے کا پتہ دے

گزری ہے مری عمر سرابوں کے سفر میں

اے ریگ رواں اب کسی چشمے کا پتہ دے

ہر پل کسی آہٹ پہ مرے کان لگے ہیں

جیسے ابھی کوئی ترے آنے کا پتہ دے

بکھرا ہوا ہوں صدیوں کی بے انت تہوں میں

مجھ کو کوئی کھوئے ہوئے لمحے کا پتہ دے

دہلیز دلاسا ہے نہ دیوار اماں ہے

اے در بدری میرے ٹھکانے کا پتہ دے

ہوں قید حصار رگ گرداب میں سرمدؔ

کوئی نہیں جو مجھ کو کنارے کا پتہ دے

سرمد صہبائی

واحد کشمیری

 دِل ! آن بان شان یہ اردو زبان ہے

جذبوں کی ترجمان یہ اردو زبان ہے

لمحوں میں اپنے حسن کے جلوے نکھارتی

صدیوں پہ مہر بان یہ اردو زبان ہے

آداب و احترام کے نازوں سے ہے پلی

غالب کی روح و جان یہ اردو زبان ہے

اخلاص کی بلندیاں ربط و ادابھی ہے

ہر باب آسمان یہ اردو زبان ہے

حرفوں میں اسکے عطر یے لفظوں میں چاشنی

نظموں کی پاسبان یہ اردو زبان یے

تہذیب لکھنوی ہے یہ شانِ دکن بھی ہے

گلزارِ گلستان یہ اردو زبان ہے

تاثیر راگ راگنی عکسِ غزل بھی یے

قوموں پہ سائبان یہ اردو زبان ہے

لفظوں کی طرحیں ڈال کے واحد نے جو کہی

خالص وہ نکتہ دان یہ اردو زبان ہے

واحد کشمیری