منصور خوشتر

 یوم پیدائش 03 مارچ 1986

آپ کو مجھ سے محبت بھی نہیں 

اور ”نہیں“ کہنے کی جرأت بھی نہیں

جاتے ہیں محفل سے میری جائیے

روکنا کچھ میری فطرت بھی نہیں

بے وفا کی ہمرہی سے فائدہ؟ 

اور اب چلنے کی ہمت بھی نہیں

  

میں کسی کو چھوڑ دوں تیرے لیے 

تجھ سے کچھ ایسی تو قربت بھی نہیں

 

خوشترؔ اس مہندی لگے ہاتھوں کی اب 

جانے کیوں پہلی سی رنگت بھی نہیں

منصور خوشتر

افتخار حیدر

یوم پیدائش 03 مارچ 1975

ہاتھ چلانا مشکل ہے ان موجوں کی طغیانی میں 

تم نے چھوڑ دیا لے جا کر کتنے گہرے پانی میں

جانے یہ احساس نگر میں کیسا موسم اترا ہے 

برف جمی ہے آگ کے اندر ، آگ لگی ہے پانی میں

وہ جو اک کردار کیا تھا حسن کی تابعداری کا 

اس کردار نے ڈال دیا ہے کتنا درد کہانی میں

چلتے چلتے زیست کے ایسے موڑ تلک آپہنچا ہوں 

آسانی ہے مشکل میں اور مشکل ہے آسانی میں

افتخار حیدر

جاوید عارف

 یوم پیدائش 03 مارچ

گو مجھ کو میسر تھیں بہت تیز شرابیں

میں کھینچ کے بیٹھا رہا اِس دل کی طنابیں

خوددار اناؤں کی نظر تک نہیں اُٹھی

اشیاء سے بھری رہ گئیں زردار کی قابیں

خالق کبھی ہو سکتاہے مخلوق کا دشمن ؟

ملّاں ! تیرے کہنے سے عذابیں نہ ثوابیں

اے حُسنِ حیادار ! بتا کیسا ہے پردہ ؟

گر روزِ قیامت کو ہی اُٹھنی ہیں حجابیں

جو ظُلم سہے بس وہی تحریر کئے ہیں

یوں بنتی گئیں اُن سے کتابوں پہ کتابیں

عارف یہاں موسم کے ہیں بدلے ہوۓ تیور

تُو سُرخ گُلابوں کی لگا آیا ہے دابیں

جاوید عارف

نعیم حقّی

 یوم پیدائش 03 مارچ 1978

بن سوچے سمجھے اس کا طرفدار کر دیا

تقریر جس نے تھوڑی اثر دار کردیا

وعدوں پہ اسکےکر یقیں آفت یہ مول لی

نا یاب شئے کا دل کو طلبگار کردیا

راحت کی آس باندھی جو ہم نے شریرسے

آفت نے چارو سمت سے یلغار کر دیا

اندھی عقیدتوں کا نتیجہ ہے خوف ناک

مانو نہ مانو ہم نے خبر دار کر دیا

ٹھو کر سے با ر با ر کی وہ ہی بچا نعیمؔ

ٹھوکر نے ایک ہی جسے ہوشیار کر دیا

نعیم حقّیؔ

جبار انجم

یوم پیدائش 03 مارچ 1968

جو شاخِ گل پر گلاب آئے

تو یاد وہ بے حساب آئے

ہیں دامِ الفت میں جب بھی آئے

تو ہم ہی خانہ خراب آئے

وہ چاندنی میں حجاب پلٹے

تو رقص میں ماہتاب آئے

وہ رند سادہ تھا جس کو واعظ

ہیں کر کے پورا خراب آئے

یہ کیا ستم ہے جو تشنہ لب تھے

انہیں کے حصے سراب آئے

لو ہم نے کیں چاک سب قبائیں

لو ہم بھی لے انقلاب آئے

جبارانجم

تنویر جمال عثمانی

 یوم پیدائش 02 مارچ 1974

نعت

ان کے اوصافِ حمیدہ کی قلم کاری کا

مرحبا نعت ہے عنواں میری فنکاری کا

 ان کی دہلیز پہ کشکول بنا بیٹھا ہوں

یہ ہے معیار مری عظمتِ خودداری کا

ان کے دیوانوں کی تعظیم کو لازم کر کے

کام یہ ہم نے کیا خوب سمجھ داری کا 

حمدِ معبود کبھی نعتِ پیمبر لکھ کر

کام کرتے رہو جنت میں شجر کاری کا

آپ نے جب سے اسے اپنا بنایا ہے حضور 

خوف ہوتا نہیں نادار کو ناداری کا

شکریہ شاہِ امم آپکی نسبت کے طفیل

ٹل گیا خطرہ سرِ حشر گرفتاری کا

عرشِ اعظم سے سلام آتا ہے اسکی خاطر

مرتبہ دیکھئے سرکار کے درباری کا

مجھکو اولادِ پیمبر سے محبت کے سبب

سامنا ہوگا نہیں حشر میں دشواری کا

میرے جیسوں کی بھی تنویر شفاعت کر کے

حق ادا کر دیا سرکار نے غمخواری کا

تنویر جمال عثمانی

حمیرا اکبر

 یوم پیدائش 24 فروری

تم مجھ کو ایسے غم کی ہی تصویر رہنے دو

تنہائیوں کو بس مری جاگیر رہنے دو

رکھا کرو نہ قبر پہ اب میری پھول تم 

رسوائیوں کی تھوڑی سی تشہیر رہنے دو

تم چاہے مجھ کو بیچ دو بازار میں مگر

یارو یہ میرے پاؤں کی زنجیر رہنے دو

تم لوٹ کے نہ آسکے اتنی سی بات ہے

اتنی سی بات کی چلو تفسیر رہنے دو

طعنوں سے جو بھی گھاؤ ملے بھرنے کے وہ نہیں

اتنا حمیرا کافی ہے ، تعزیر رہنے دو

حمیرا اکبر

خورشید اکرم سوز

 یوم پیدائش 01 مارچ 1965

یہاں انصاف کا سودا ہوا ہے

یہ منظر تو مرا دیکھا ہوا ہے

جبین شعر پر لکھا ہوا ہے

تری محفل میں فن رسوا ہوا ہے

کبھی جو چڑھتے دریا کی طرح تھا

اب اپنی ذات میں سمٹا ہوا ہے

ہمیں پھر زخم اپنوں نے دیے ہیں

کہ خود ہم کو کوئی دھوکہ ہوا ہے

جنون رہبری ہے جسکے دل میں

وہ خود ہی راہ سے بھٹکا ہوا ہے

غزل جب میں نے اسکے نام کر دی

تو خاص و عام میں چرچا ہوا ہے

عمل سے زندگی بنتی ہے لیکن

مقدر کا بھی کچھ لکھا ہوا ہے

ہوئی ہر شے گراں اے سوز لیکن

لہو اپنا بہت سستا ہوا ہے

خورشید اکرم سوز

شائق سعیدی

 یوم پیدائش 02 مارچ

وہ سرِ دشت مری پیاس بجھا دیتا ہے

موج دریا میں دوبارہ بھی پھرا دیتا ہے

دل مرا پہلے محبت سے پریشان ہے اور

اک نیا شخص محبت کی صدا دیتا ہے

جو تمہیں مفت ملے عشق نہیں آب سبیل

جوئے شیریں ہے یہ فرہاد کھپا دیتا ہے

بات کرنی ہے اگر تجھ کو تو پھر سوچ کے کر

کیونکہ اک لفظ بھی نسلوں کا پتہ دیتا ہے

اک تناسب سے مجھے یاد وہ کرتا ہے مگر

میں اسے یاد دلاؤں تو بھلا دیتا ہے

ایرے غیرے سے ستائش کی تمنا ہی نہیں

کامل ایماں ہے کہ عزت تو خدا دیتا ہے

تجھ پہ سارا یہ کرم رب کا ہے شائق جو تجھے 

ہر نئی نظم میں لفظوں کی عطا دیتا ہے

شائق سعیدی

شیخ ایاز

یوم پیدائش 02 مارچ 1923

رات کروٹ بدل رہی ہے دیکھ

تیری زلفوں میں ڈھل رہی ہے دیکھ

اور اک ساغرِ خمار آگیں

زندگانی سنبھل رہی ہے دیکھ

یہ صُراحیء بادۂ ہی اکثر

تیرا نعم البدل رہی ہے دیکھ

حسنِ گل میں کمی نہیں لیکن

زندگی خوں اُگل رہی ہے دیکھ

رنگ لائے گی کیا یہ روحِ عصر 

کشت و خوں میں جو پل رہی ہے دیکھ

جامۂ کوہ کن میں روحِ جبر

اک نئی چال چل رہی ہے دیکھ 

ظلمتِ زیست سے الجھتا رہ

شمعِ تقدیر جل رہی ہے دیکھ

اک سحر کی تلاش پیہم میں

زندگی آنکھ مل رہی ہے دیکھ

پرچمِ عزم کو بلند کر اور

وہ مشیت سی ٹل رہی ہے دیکھ

شیخ ایاز